Ich Hainrich von Valkenstain vergich offentlich an disen brief und tuen chunt allen leuten, di in sehent oder ho^erent lesen, daz ich mit verdachten muet mit aller meiner eriben gunst und nach meiner besten Vreund rat zu der zeit und ich es wol getuen mo^echt, lediglich geschaft und gegeben han den erbern geistleichen hern dem abtt und dem convent dez chlosters ze Engelcell ainen hof datz Kallenhaim und ainen datz Perbind, di mein rechts aigen gewesen sint, unser vrauen ze ehren und mir und meiner hausvrauen, frauen Annen, der got genad, meinen vorvordern und auch allen meinen nachomen ze einen ewigen selgeret, also daz di vorgenanten hern ze Engelzell diselben ho^ef sullen inhaben ewiglich in aigens gewer mit allen nuzen, mit alli dem und dazu geho^ert, ze holz und ze veld, besucht und unbesucht, mit sogetaner beschaiden, daz si unser aller jarzeit begen sullen iarlich des andern tags nach dem letzten unser vrauentag mit vigili und mit selmess nach ires ordens gueter gewonhait und auch an denselben tag schullen von den selben ho^efen dem convent geben werden zwai phund pheninge, ain phunt von dem hof ze Perbind mir zu selgeret und ain phunt von dem hof datz Kallenheim meiner hausvrauen und allen meinen nachchomen zu selgeret. mit den zwai phunten sol man dem convent bezzern sein taglich phru^ent als vill die phunt geraichen und besunderlich an unsern jartag, und was des u^ebrigen gelts ist von den ho^efen, daz sullen si anlegen an ander ires chloster notdurft. derselben ho^ef sul ich egenanter Hainrich von Falkenstain di weil ich leb ir scherm und ir gewer sein, als ich von recht soll an aller stat, wo in des not geschiecht und nach mir mu^egen si di emphelen wen si wellen, und daz daz also stet und unzebrochen beleib, daru^eber gib ich fu^er mich und fu^er all mein eriben dem oftgenanten convent und dem chloster ze Engelcell disen brief besigelten mit meinen und meines bruder Chalchochs insigeln ze einen warn urchunt diser sache. daz ist geschechen und der brief ist gegeben, da man zalt von Christes gepurd dreutzehen hundert iar, darnach in dem fu^enf und viertzigsten jar an unser vrauentag, als si geboren war.

Source Fulltext: OÖUB 6 (Wien 1872), Nr. 521, S. 526f.