Ich her Marchart Shech Hern Dvrings Svn des shechen von SteiR ich tvn chvnt allen den, di nv sinde vnd noch chunftige nach vns werdent, daz ich vnd mein hausfrowe Alheit sin gestanten von dem wingarten ze Nevnbvrch, den her Joseph het von dem Gotshaus ze Gersten ze pvrchrecht vnd vns vngevallen was, vnd haben auch gelobt heren vlrich der nv abt ist ze Gersten, vnd siner Sampnunge, Swer auf den weingarten spricht, iz sej der Chlosner oder ander vnser Erben, daz wir des gewern hern vlrichs des vorgenanten abtes vnd der Sampnunge wesen wellen, swaz man darauf ze sprechen hat mit recht, vnd daz im daz vnd siner Sampnunge stête beleibe vnd vnuerchertz, davu^er han ich in gesatzet hern Chunrat von volchenstorf vnd hern Heinrichen hern Marcharts svn des preuhafens vnd hern Heinreichen hern perchtoldes svn des preuhafen, ob ich in nicht zerledigiht, als ich gelobt han, den weingarten, swaz der Chlosner darauf ze sprechen hiet oder ander mein vnd meiner hausfrowen geerben, swenne mein herre der apte in vodert, di vorgenanten burgel so shullen si in den Ochte tagen invarn datz Steyˆr in ein leithaus vnd shullen nicht auzchomen, im werde sin weingart zerlediget von allen den, di darauf icht ze sprechen habent. darvber gib ich im disen brief versigelt mit meinem Insigel vnd mit Hern Chunrats von volchenstorf, Mit hern Hainreichs des preuhafens hern Marcharts svn vnd hern Heinreichs preuhafen hern perchtolts svn. Gib im darvber gezeuch hern Chunrat von volchenstorf vnd bede preuhaefen, hern Ditmarn vom Shachen, Hern vlrich von Tvrsendorf, Hern Ditmarn sinen brueder, Ernsten von Lobnich, Heinreichen von Stadel vnd Otten sinen brueder, Erchengern den Svltzer vnd ander erber leut. Ditz ist geshehen nach Christes bv^erte vber tausent iar, zwai hvndert iar, Oecht vnd Neuntzge iar tzwisshen svnewenten vnd Sant Peters tage.

Source Fulltext: OÖUB 4 (Wien 1867) S. 284-285, Nr. 306