Ich abte vlreich von gotes genaden des Gotshaus datz Gersten Tv^en chvnd allen den, die disen brief ansechent oder noch chvnftige werdent, daz ze vns ist chomen vnsers ammannes hausfrowe von weicherstorf div albers, daz vns div hat ermanet mit abte frideriches brifen, daz si vnd alle ir erben schol haben den weingarten, der da haizzet der shelle, ze rechtem purchrecht zwaintzge pfenninge an sand Michels tage ze geben. Swenne si des nicht enteten si oder ir erben, so shol si geben div wandel, div der berch ze recht hat, da der weingart leit, vnd daz si shol irn frum shaffen damit ze verchauffen oder ze versetzen, also purchrecht recht hat, mit vnser hant. Daz im daz stete beleibe vnd vnverchert, des geben wir im disen brife versigelt mit vnserm insigel vnd mit vnsers Couventz vnd dise erber gezevge: Hern Chunrat von hauspach, Hern vlrich Shechen, Her Dietmar von shachen, Hern Chunrat von volchenstorf, Hern Otten von hauspach, den Richter Leben von der Newenstat, Rudolfen Maurer, Dietreich eisenein, Leutolt pucker vnd ander erber pvrger. Daz daz geshehen ist, des sint von Christes gebu^ert Tausent iar, zwai hvndert iar, Nevnzige iar vnd in dem zehenten iar.

Source Fulltext: OÖUB 4 (Wien 1867) S. 361-362, Nr. 389