Ich Vlreich in gotes genaden abte ze Gersten tv^en chvnt allen den, di disen brief sehent oder horent lesen, daz ich vnd div sampnunge mit gvten willen haben vns des verdachte vnd daz wir erchant haben di grosse trev an im, di vnse ditreiche vnser diener hat gezaiget, dar vmbe haben wir im den hof geliehen ze aigloren vnd das lechen, daz im dem hof leit, da von sol er vns geben alle iar zechen pfenningen vnd siben schillingen an sand Mertinztag. vnd nach seinem to^et schol noch seine hovsfrowe noch seine chint gechaine recht haben an dem hof ze aigloren. vnd dar vber geb wir im ze stetem vrchvnde disen brief mit vnsener jnsigeln vnd der sampnunge insigeln. des sinde gezevge her Richer der prior vnd der custer vnd der chvnrat der vbelman vnd her perchtolt vnd der chvnrat von volchenstorf vnd div prevhafen von steir vnd der schachner.

Source Fulltext: OÖUB 4 (Wien 1867) S. 360, Nr. 387