Ich Chvnrat von volchenstorf tv°n chvnt an disem brife allen den, di in sehent, lesent oder horent, di nv lebent vnd noch chvnftige sinde, Daz ich mit verdachten mvete vnd mit gvetlichem willen vnd mit miner chinde vnd aller miner vriunde willen vnd rate Otten dem Milchtopfen gestattet vnd verhenget han, daz erden hof in der Gersten, den er ze lehen von mir het vnd den vor ich gechauffet het von dem Stadeler, daz er den mit vreime (sic) recht vnd ewichlich dvrch got vnd dvrch siner sele willen vnd siner vodern sele vnser frowen vnd ir gotshaus ze gersten gegeben hat also mit beschaidener rede, das er Otte den selben hofe inne haben schol vntz an sinen tode, vnd schol er di weil von dem selben hofe alle iar dienen eine pfvnt phenninge winner mvnzze dem vorgenanten Gotshaus an vnser frowen tage, swenne man daz dinst geit, ein halbez phvnt vnd an sand George tage ein halbez vnd swenne er Otte der vorgenant nimer ist, so schol der selbe hofe mit allem recht vnd mit alle dem, daz darzv gehoret, ledichlich sin des vorgenanten Gotshausse ze Gersten. Daz di rede vnd daz gelube stet beleibe vnd vnuercheret von mir Chvnraten von volchenstorf vmb min lehenshafte, der ich mich geauzzent han, vnd von Otten dem Milchtopfen vmb sin aigenshafte vnd von vnser beider geerben vnd aller vnser afterchvnft. dar vmb gib ich disen brife ze einem vrchvnde vnd zv einer bestetigunge versigelt mit meinem insigel vnd mit des selben Ottens insigel vnd darnach mit der erbern burger insigel von Steir. Disiv rede vnd daz gelube ist geschehen, do von Christes geburde ergangen waren tausent iar, dreu hvndert iar, dar nach in dem vierden iar bi abte vlrichs ziten, der do lebet.

Source Fulltext: OÖUB 4 (Wien 1867) S. 471-472, Nr. 507