Ich ott Milichtopf ze steyr tvn chvnt an disem prief allen den, die in lesent, sehent oder horent, di nv lebent vnd noch chvmftich sint, daz ich mit verdachtem mv°t vnd mit gv^etlichem willen vnd mit meiner chinde vnd ander meiner vrevnt rat ein chrautgarten in der waid von der chravthutten der drit gart, der mein rechtes aigen waz, dem Gotzhaus hintz Gersten han gegeben nach meinem tode ledichlichen mit allem recht miner sel vnd miner vodern sel zv einem ewigen selgeret. Und daz daz gelub stete beleibe vnd vnuercheret, dar vm gib ich disen brief zv einem vrchonne versigelt mit meinem insigel vnd mit den erbern gezevgen, di her nach geschriben sint, Her Marchart der scheche, Her heinrich prevhafen, Marchart der prevhafen, peter ponhalm, Wlfinch, ott der chersperger vnd ott der chersperger purger datz steyr vnd ander frvm levte. Vnd ist daz geschehen nach christes geburde vber tavsent Jar vnd driwe hundert Jar vnd darnach in dem sechten iar.

Source Fulltext: OÖUB 4 (Wien 1867) S. 514-515, Nr. 553