Ich vlrich vnd mein brvder Hainrich vlriches svne des schvtzen vnd vnser baider erben veriehen vnd tvn chvnt allen den, die disen prief sehent vnd horent lesen vnd di nv sint vnd hernach chvmftich werdent, Daz wir mit verdahtem mvt vnd mit vnserm gvtlichem willen haben ze chauffen gegeben fv^er rehtes aigen vnser hv^eb datz den hofern mit allem dem nvtze, vnd davon chvmt, versv^eht vnd vnversv^eht, Meinharden ze Sinzenperig vnd allen sinen erben vmb sehs vnd vierzich phvnt phenning wiener mvnse vnd haben in di vorgenanten hv^eb gesafzt fv^er ahzich phvnt phening wienner mvnse ze einem scherm also mit der beschaidenhait, ob iemen vnser erben di vorgesprochen hv^eb wolde lo^esen von in für ahzich phvnt phenning wienner mvnse, di schuln si im ze lo^esen geben vnd ist des niht, so sol di vorgeschriben hv^eb ir rehtes aigen sein ewichlichen vnd hat darvmb ze vns gelobt Hauch der posche vnd Hainrich der grv^eber. Daz in dev rede stete vnd vnverchert beleib, darvber geh wir in disen prief ze einem v^erchvnde vnd ze einem gezevg gevestent mit hern Hainriches von walsse anhangvndem Insigel vnd Hern Hainriches von volchenstorf. Des sint gezevg Her alber von asperig, Hainrich von hvsendorf, Richer sein brv^eder, vlrich von hvsendorf, Ditrich sein brv^eder, Ekpreht, Ortel von Sinzenperig, Alber von Sinzenperig, Richer von Sinzenperig, Albreht von wald, Gvndel von Rizenwinchel, Hainrich der chalnperiger vnd ander warhaft levt, di dapi warn. Daz ist geschehen, do von christes gebv^ert warn ergangen Tausent iar, drevhvndert iar, in dem zehenden iar nach sand florians tag des mitichen.

Source Fulltext: OÖUB 5 (Wien 1868) S. 33-34, Nr. 31