Ich Vlreich der Jacober genant vergih an disem prief offenbar vnd tu^en chunt allen den, die disen prief sehent oder ho^erent lesen, die nu lebent vnd hernach chunftich sint, daz ich gelten solt dem Erbern Manne Ditmarn dem witlensperger genant zwai hundert phunt pfenning wienner mu^enz vnd vu^er di selben pfenning han ich wolbedaht vnd mit gu^etleichem willen meiner paider Swester Kathrein vnd Sophein genant vnd auch mit gůtem willen aller vnserr Erben vnd nah der pesten vnserr vreunt Rat dem vorgenanten Ditmarn vnd vron Sophein seiner Hausvrowen vnd allen iern Erben, di si habent oder noh gewinnent, meinen Hof in dem Hag gelegen vnd genant in wolfarerr pharr vnd zwo Hofstat da pei mit allem nutz vnd reht vnd dar zv° geho^ert besuht vnd vnbesuht, gestift vnd vngestift, zv holcz vnd zv veld gesatzt an pfandes stat vnd nah Landes reht also mit beschaidner red, daz di vorgenanten Ditmar, sein Hausvrowe vnd ir Erben den vorgeschriben Hof vnd waz dar zv° geho^ert, in nutz vnd in gwer haben schullen mit allem dem Reht vnd wir daz vorgeschriben Gu^et gehabt haben vnd vnser vodern. Ich han auch im den Satz auf dem vorgeschriben Hof vnd waz dar zv^e geho^ert, gantwůrt vnd bestetet mit allem dem Reht, daz ich solt vnd zder zeit, do ich ez wol getu^en maht. Waer aber daz getan, daz iemen meiner Erben den vorgeschriben Hof haben wolt vnd des Erb wesen wolt, wer der ist, der geb dem vorgenanten Ditmarn, seiner Hausvrowen ver Sophein vnd ir Erben zwai Hundert phunt phenning newer wienner mu^enz an Sanct Michels tach. Daz dev wandlung vnd dev red vber den vorgeschriben Satz also stet beleib vnd vnuerchert, dar vmb vnd dar vber gib ich im disen prief mit meinem anhangunden Insigel vnd durch pezzer gwarhait mit der Edlen Herren Hern Heinreichs von volchenstorf des alten, in des Lantgeriht der vorgeschriben Hof leit, vnd hern Eberhartes von walsse anhangunden Insigeln wol bestetet vnd gevestent. Vnd sint auch des gezeuch der Edel Herr her Heinreich von walse der hauptman datz Ens, Her Heinreich, Her Reinprecht, Her Fridreich sein su^en, Her Heinreich von volchenstorf der jung, Her Meinhart von Sinczenperg, Her Chunrat von Mitterberch, Her Charl der Rech, Her Heinreich von Sweinpach, wilhalmen von Chersperch, Fridreich vnd wolfhart sein pru^eder, Hertweich von Chersperg, Marchart von Chersperg, Ortolf vnd wilhalm sein pru^eder, Otte von Stadel vnd Durnch sein veter, fridreich der wolfstain vnd Ditmar sein pru^eder, Fridreich der zwichel, Seifrid vnd vlreich sein pru^eder, Hertweich von Pruk vnd Otte sein sun vnd anderr Erberr Leut dannoch mer, den di vorgeschriben red ist chunt vnd wol gewizzen. Der prief ist gegeben, do von vnsers Herren Gepu^erd sint ergangen vnd gewesen Dreuzehen Hundert jar, darnach in dem ahtzehenden jar an Sanct vlreiches tach.

Source Fulltext: OÖUB 5 (Wien 1868) S. 224-225, Nr. 228