Ich zirvos Merswanger vnd mein hausvrowe vre Jevt vnd Jans mein Svn vnd alle mein gerben veriehen vnd tv^en chvnt an disem prief allen den, di in lesent, sehent oder horent, di nv lebent vnd noch chvmftig sint, Daz wir mit verdachtem mv°t vnd mit gv°tlichem willen aller vnser gerben dem Gotshaus ze Gersten vnser vrowen vnd der Sampnvnge daselben haben geben ze selgereht daz gv^et, daz hie benant ist, mit allew dem, vnd darzv gehoret, Cho^ehleinshub, In dem Lintech, Auf dem Revt, Auf dem Maizze, In dem Graben, Auf der Oede Vnd daz lehen auf der Oede, Des vaistenhub vnd daz Im Tal, Daz holz an dem Chrillenperge vnd di vronwis, daz vnser rehtes aigen ist versuht vnd vnversvht, ze holze vnd ze velde, gepavns vnd vngepavns, als wir iz haben manich Jar vnd tag gehabt, vnd wellen auch des selben gutes herre vnd gewer sein, als Lantz reht ist. Vnd ob iemen noch dem vorgenanten gv^et chrigen wolt vnd reht darauf gehe, der sol dem vorgenantem Gotshaus ze Gersten daz Gu^et widerlegen mit drin hundert phunt phenninge wienner mvnz. Daz di rede stete vnd vnzerbrochen dem vorgenantem Gotshaus beleib, geb wir disen prief zv einem ewigen vrchvnde versigelt mit minem vnd mit mines suns insigel vnd mit hern albers von chvnring vnd mit hern Hadmars des stuchsen vnd mit hern Otten des Gerloser insigel, di diser sach zevge sint, vnd mit den erbern Herren, di hernach geschriben sint zevge, Her Rudolf vnd Her Hertnid von Stadekke, Her Mertein der Stuchs, Herr Ott von habispach, Her Sifrid von Chranichperge, Her Gotfrid, Her Nykla, Her Ott, Her Heinrich bruder von wildungsmavr, Her HeinRich von Haslawe, Her Rudolf von Arbaiztal, Her Dither von Hintperch, Her Stephan von Sand Marien, Her Hertnid der valb, Her Pilgreim der Straifinch vnd Her Haim der Straifinch. Vnd ist daz geschehen, da ergangen waren nach christes geburde Drevzehen hundert Jar vnd darnach in dem achtzehenten Jar an Sand philippes vnd an Sand Jacobs Tag der zwelpoten.||
Aussen von gleichzeitiger Hand: Empcio prediorum in Neunchirichen.

Source Fulltext: OÖUB 5 (Wien 1868) S. 214-215, Nr. 217