Nos Fridericus dei gracia Romanorum Rex semper Augustus Vniuersis Sacri Romani Imperij fidelibus volumus esse notum, quod ortis iam dudum quibusdam questionibus et querelis inter Honorabiles et Religiosos uiros ... Abbatem et Conuentum Monasterij in Garsten ordinis sancti Benedicti Patauiensis dyocesis ex una et honorabiles ac Religiosos uiros ... Abbatem et Conuentum Monasterij Campililiorum Cysterciensis ordinis dicte dyocesis ex parte altera super eo, quod prefati ... Abbas et Conuentus Monasterij in Ga^ersten proponebant, homines suos esse debere liberos et exemptos a solucione qualibet Thelonei atque mute in foro wylhalmspurch sicut et in aliis locis pretextu priuilegiorum suorum et consuetudinis hactenus obseruate, Memoratis ... Abbate et Conuentu Monasterij Campililiorum predicti asserentibus uiceuersa, quod homines dicti Monasterij in Ga^ersten in prefato foro suo wylhalmspurch sicut aliorum homines ad solucionem thelonei atque mute tenentur astricti uirtute priuilegiorum sibi competencium et eciam consuetudinis antiquitus obseruate. Petentibus itaque dictis partibus sibi per nos iusticiam fieri in premissis Nos de parcium consensu iuris ordine pretermisso ipsam causam et questionem de piano per concordiam, prout plus decuit et eciam expediuit, decreuimus terminare auctoritate conpromissi a predictis partibus liberaliter in nos facti, pronunciauimus in hunc modum, quod sepefati. Abbas et Conuentus Monasterij Campililiorum ab hominibus Monasterij in Ga^ersten in antea recipere debent in predicto loco Theloneum atque mutam, sicut ab aliis hominibus ibidem recipere consueuerunt jta, quod quantitatem recepcionis solitam non excedant et in recompensam iuris huiusmodi ipsi Monasterio Campililiorum per nos amicabiliter ordinati vnius libre denariorum wiennensium perpetui redditus iam dicto Monasterio in Ga^ersten per ipsos ... Abbatem et Conuentum Monasterij Campililiorum debet inter fluuios Traysem et Bielach uel alibi, ubi dicte partes conuenerint, assignacione specifica deputari. Nolumus tamen, quod per hanc nostram amicabilem conpositionem alicui Monasteriorum predictorum in priuilegiis et iuribus suis preiudicium aliquod generetur. Et in testimonium et euidenciam premissorum et perpetuam firmitatem presens scriptum Regalis nostri Sigilli signaculo duximus consignandum. Datum in Newenburga xiiij. kalendas Junij Anno domini Millesimo Trecentesimo Decimo octavo, Regni uero nostri Quarto.

Source Fulltext: OÖUB 5 (Wien 1868) S. 216-217, Nr. 219