WIR Ott von gotes gnaden Hertzog ze O^esterrich vnd ze Styr, Herre ze Chrayn, auf der Marich vnd ze Portenawe Veriehen vnd tûn chunt offenlich mit disem brief allen den, die in ansehent, lesent oder horent lesen, die ietzv lebent oder hernach chunftig werdent, Daz wir durch aller vnserr vordern sel vnd vnsers hailes willen fûr vns vnd vnsern lieben bruder Hertzog Albrechten ze Osterrich vnd ze Styr vnd vnser Erben vnd nachkomen dem Gotshaus ze Gêrsten, daz wir an allen seinen gůten, die in vnsern lanten gelegen sint, von recht hoˆhen vnd foˆrdern sullen, die sunder gnad getan haben vnd tûn ouch mit disem brief, daz des vorgenanten Gotshaus Rihter vnd Amptleût in der Gegent ze Gaflentz auf den gûten, die mit den gemerchen, die hernach geschriben stênt, vmbuangen sint von dem Perg, der da haizzet der Merhenuale, vntz an daz wazzer, daz die frodnitz haizzet, vnd von dem Pache, der di Gaflentz haizzet, da er erst entspringet, vntz da er fleuzzet in di Ens, vnd von dem Aigen, daz da haizzet auf dem Gemerche, vntz an daz aigen, daz da haizzet hinder dem Ouen, darauf si êmaln vmb alle sache gerihtet habent denn alein, waz an den toˆd gie, fûrbaz vˆreylich vnd vrloublich gerihten mugen vnd den Pan vnd Stokch vnd Galgen haben sullen auf irem gut vmb todsleg vnd vmb alle sache, die an den tod gent. Vnd darvmb gebieten wir vestichleichen allen Rihtern, si sein vnser Rihter oder ander iemans, daz si in die selben gnade stêt halten vnd dawider in dhainen weg tun. Vnd daz allez, daz vorgeschriben ist, dem vorgenanten Gotshaus von vns also stêt vnd vnzerbrochen beleibe, geben wir im disen brief ze Ainem vˆrchunde versigelten mit vnserm hangunden .Jnsigel. Der ist geben ze Lynntz, Da man zalt von Christes gebûrde Dreutzehen Hundert jar vnd darnach in dem Ainz vnd Dreizzigisten jar des Eritags nach der Oˆsterwochen.

Source Fulltext: OÖUB 6 (Wien 1872) S. 9f., Nr. 8