Ich Berichtold von Losenstain vnd ich Dyetmar vnd all mein prueder von Losenstain vnd all vnser eriben veriechen offenbar mit disem brief allen den, di in sechent oder ho^erent lesen, daz wir mit wolbedachtem mu^et vnd durich vns vnd vnser vorvodern Selen hail willen auz vnserm nucze vnd gewer recht vnd redleich geben haben den Zyegelhoff pei Steyr mit allen nu^eczen vnd rechten, vnd da z/ee gehort, wi daz genant ist, den erbern geistleichen herren gen Gersten in di oblay, vnd daz selb guet dint alle jar jerleich an vnser vrowen tag zder dinst zeit fumf schilling alter wienner phenning vnd an sand Georigentag auch fumf schilling alter wienner phenning vnd vmb daz selb guet schullen si singen alle jar dez suntags nachtes vor dem auffertag ein gancze gesungen vigily vnd dez nachsten mentags morigens darnach ein gesungene selmisse mit sechs prinnunden cherczen pei der par mir Perichtolden vnd meiner hausfrown Margreten von Losenstain selen vnd allen vnsern voruodern seien ze hilff vnd ze trost vnd jerleich an sand Jacobs tag decz selben nachtes ein gancz gesungene vigily vnd decz morigens darnach ein gesungene selmisse hern Gundakchern vnd seiner housfrown vrown Annen selen vnd allen ieren voruodern selen ze hilff vnd ze trost mit sechs prinnunden cherczen pei der par vnd mit lo^euten ze paider jartagen, alz da zu^e geho^ert, vnd dar vmb sol man den herren in di oblay ze igleichem jartag raichen vnd geben ein halb phunt wienner phenning vnd in di gustray dreizzik phenning fur di cherczen vnd fur daz lawten; vnd wenn ich vorgenanter Perichtold von Losenstain nicht enpin, so schullen si meinen vnd meiner housfrowen jartag begen auf den tag, vnd ich verschaiden pin, vnd schullen vns dar an begen ze alle dem rechten, als vor verschriben ist. Wu^erden si dar an indert sowmig, so schult sich vnser eriben decz vorgenanten guetes au dem Zyegelhoff vnder winden so lang, vncz si dew vor vorgenanten jartaeg paid gancz vnd gar volfuerent vnd begent, so schullen si denn daz guet wider jnn haben mit allen rechten vnd nuczen, alz da zu^e geho^ert vnd alz wir ez inn gehabt haben, vnd sein auch dez guets jr scherm vnd gewer, wo in dez not geschicht, alz landez recht vnd gewonhait ist in Ostereich. Vnd daz di sache vnd daz sa^elgret furbaz stet vnd vnzeprochen beleib, dar vber geb wir jch obgenanter Berichtold vnd ich Dyetmar von Losenstain disen offen brief versigelten mit vnsern paiden anhangunden jnsigeln, vnd dez zeug ist her Dyetreich von Losenstain mit seinem anhangenden jnsigel. Der brief ist geben nach Christi gepu^erde drewczechen hundert jar vnd darnach in dem ain vnd fumfczkistem jar des suntags nach dem heiligen Prechen tag.

Source Fulltext: OÖUB 7 (Wien 1876) S. 222f., Nr. 219