Ich Kathrei Tu^erings des Lertz witib, weylnt purger ze Steyrr, dem Got genad, vergich vnd tu^en chunt allen den, di disen brief sechent oder lesen ho^ernt, daz ich mit wolbedachtem m/et, mit meines vaters vnd mit aller meiner geswistret vnd erben gu^etleich willen, nach meiner pesten vrevnt rat vnd gunst recht vnd redleich gegeben han dem gotshaus ze Ga^ersten meinen hof gelegen ze Chremstorf, der rechtz freys aygen ist, mit allen den rechten vnd nutzen, di darzu^e geho^ernt ze holtz vnd ze veld, versu^echt vnd vnu^eersucht, mit der beschaidenhait, daz si meins vorgenanten wiertz iartag vnd den mein, swenn ich nimer pin, vnd aller vnser vodern ewigchleich hegen schullen mit vigili vnd mit messe all iar dez na^echsten maentags nach dem aufferttag, wann daz mein wiert mit mier schůf an seinen lesten zeiten mit meinem gu^etleichen willen, als es noch heut ze tag mein will ist, vnd schol auch dez vorgenanten gotzhaus gewer sein fu^er alle chrieg vnd ansprach nach lantz recht. Daz di red sta^et vnd vntzebrochen beleib, darvber gib ich disen brief gesigelten mit meiner lieben bru^eder Fridreichs, Pauleins, Wernhartz der Tungozzinger anhangundem jnsigel, vnd mit meins lieben swagers Philipps der Tungozzinger aydem anhangundem jnsigel, dahinder ich mich vnd mein bru^eder Thomas der Tungozzinger vns verpinden mit vnsern trewn allez daz staet ze behalten, daz oben verschriben ist, wann wier nicht jnsigel haben. Der brief ist geben nach Christes gepu^erd drevtzechen hundert jar vnd in dem ayns vnd fumftzkistem jar an sand Pauls tag, als er bechert wart.

Source Fulltext: OÖUB 7 (Wien 1876) S. 224, Nr. 221