Ich Ottakcher der Gruenpecht vergich offenleich mit diesem prief vnd tu^en chunt allen la^euten den er fu^er chu^emt, daz ich mit willen aller meiner erben han ze chauffen geben dem erbern herrn apt Erharden vnd seim gotshaus ze Ga^esten daz Guetel auf dem Predal daz aygen ist, mit allen den rechten nutzen vnd gesuechen, di dar zu^e gehornt ze holtz vnd ze veld wie di genant sind, vmb syben phunt wyenner pfening, der ich gantz gewert pin. Vnd schullen ouch ich vnd mein erben des ob genanten gu^etleins sein vnd seins gotshaus gewer vnd furstant sein fu^er all anspracht, wo in des not geschicht, als lants recht ist in Steyr, vnd schullen si daz haben auf mir vnd auf mein erben vnd auf aller vnser hab, wo wir di haben. Daz in daz stêt beleib, gib ich in disen prief versigelten mit meinem insigel vnd mit meins lieben swogers des Perchaymer Reycheren jnsigel vnd mit Ottleinz des Hauser jnsigel, di si durch meiner pet willen dar an gehangen habent in an schaden. Geben nach Christes gepurtt drev zehen hvndert jar, dar nach in dem fu^emf vnd fu^emftzigsten iar an sand Georgen tag.

Source Fulltext: OÖUB 7 (Wien 1876) S. 410, Nr. 397