Ich Jans der Haekhel gesessen datz Ru^etzing in Hirsinger pfarre vnd ich Elspet sein hausfraw^oe (leerer Raum) dez Aigener tochter, dem Got genade, vnd mit vns alle vnser erben, di wir mit einander haben cder die ich pei meinn voderen wirtten gehabt han, vnd alle die ze recht nach der hu^eb v^ef dem Perg erbent, vergehen vnd tu^en chu^ent allen den, die den brief sehent oder ho^erent lesen, daz wir mit wolverdahtem můt vnd mit gu^etlichem willen nach rat vnserr pesten friunt ze chaůffen haben gegeben dem erbern herren abt Erharten ze Gaersten vnd dem gotzhaůs ze Gaersten vnser aigenev hu^eeb genant Auf dem Perg gelegen in Aschacher pfarre mit allev dev, vnd darzu geho^ert ze dorffe ze velde ze holtze ze waide oder swi ez genant ist besucht oder vnbesucht aus vnserm nu^etz vnd gewer in dez obgenanten abtz vnd gotzhaůsse nu^etz vnd gewer vmb sehs vnd zwaintzich pfunt pfening wienner mu^ensse, der si vns gar vnd gentzlich verricht vnd gewert habent mit beraiten pfening, wir sullen auch dez chauffes ir gewer sein fu^er alle chrieg vnd ansprach nach dez lantz recht. Taet wir dez nicht vnd naem dez daz obgenant gotzhaůs dhain schaden, den sol ez haben auf aller vnserr hab wo wir di haben, vnd dez zv ainer g/outen geziuchnůsse, wann wir selb aigener insigel nicht haben, geb wir fur vns vnd alle erben gegenwu^ertig vnd chu^enftig den brief versigelten mit dez erbern herren anhangundem insigel hern Gundachers von Ror vnd mit Go^etfritz dez Sintzenperger insigel. Daz ist geschehen, do man zalt von Christi gebu^ertte dreuzehenhundert iar vnd in dem fu^enf vnd fu^enfczichistem iar an sant Andres abent.

Source Fulltext: OÖUB 7 (Wien 1876) S. 425f., Nr. 417