Ich Ditmar von dem Stayn vnd mein hausvrow vro Margret vnd all vnser erben, wi di genant sein, tun chunt allen den di den brief sehent oder lesen ho^erent, daz wier mit wolbedachtem mu^et vnd mit veraintem rat vnserr pesten vreunt tzv der zeit do wier iz wol getůn mochten, meinem genedigen herren abt Erharten vnd dem gotzhaws datz Gaersten aufgeben haben di mul datz dem Stayn, da wir êmal aufgesezzen sein, mit wem er di stift oder wer darauf chu^emt, nimmermer chain ansprach schullen haben mit recht noch an recht noch gewinnen, vnd haben im darfu^er gesatzt viertzk phunt phening wienner mu^enzz, ob daz wêr, daz wier daz vberfueren mit dhainerlay sach, daz zwen pider man gesagen mu^egen pey iern trewn, so habent sich di vierzk phunt phening vervallen. Vnd fur diselben phening sezz ich vorgenanter Ditmar von dem Stayn mein hawsvrow Margret vnd all vnser erben di porigen: Seidlein mein brueder, Gotfrid den Syntzenperger, Stephan den Ponhalm, Petrein den Gusmetzen, Vlrich den Rosslen, Heinrich Lůg in stal, Ortolf Zehentner von Tuntzing, Jo^erig den Weber, Chunrat ab dem Perg, Leupolt Nagel, Nikla Hafner, Heinrich Farster von Pergarn, Wulfinch Fuller, Heinrich der Cherspergerinn Mulner, Ymbrinch Stuppel, Chunrat Mulner, Albrecht Gartner, Chunrat Wachshentel. Virich Ro^egerl, Jans Aler, Chunrat Tru^egerl, Vlrich im Ayech, Ewerhart am Art, Vlrich Ha^esiber, Ott von dem Stayn, Ortel den List, Vlrich im Pawngarten, Ymbrich im Holtz, Heinrich sein sun, Seydel Pischolf, Vlrich Pischolf, Heinrich im Stochkech, Ott den Renche, Ott Ha^esiber, Albrecht Zimmerman, Heinrich auf dem Weinperg, Leupolt Sagmulner, Gundel Chramer von Syernich, Heinrich Aler, Vlrich sein sun, vnd ieder man ist selb geschol fu^er sein phunt phening. Vnd tzv einer gu^eten stêtichait vnd pezzern sicherhait verpintt wier v^ens all stêt ze behalten alz, daz vor geschriben stêt, vnder Go^etfrid des Syntzenperger anhangundem insigel vnd Stephan des Ponhalm anhangundem insigel. Daz ist geschehen, do man zalt nach Christi gepv^erd tausent iar dreuhundert iar darnach in dem sechs vnd funfzkistem iar an vnser vrown tag tzv der liechtmess.

Source Fulltext: OÖUB 7 (Wien 1876) S. 432f., Nr. 425