Ich Hainreich der Prevhaven vnd ich Kathrei sein hausfraw^oe vnd mit vns alle vnser erben swie die genant sint, vergehen vnd tůn chunt allen den die den brief sehent oder ho^erent lesent, daz wir mit wolverdachtem můt vnd mit gu^etlichem willen aller erben vnd auch nach rat vnserr pesten friunt gesetzt haben als satzes recht ist, Weinmar dem Tiurwanger purger ze Steyr vnd seiner haůsfrawen Chu^enigunden vnd allen irn erben vnsern hof ze Wolfarn, do etwann der Osterman aufgesezzen waz vnd der vnser inwert-aigen ist gein Steir in die půrch, mit allen den rechten vnd nu^etzen die darzu geho^ernt swi di genant sint si sein bestift oder vnbestift, fur fu^enftzicg pfunt pfening wienner mu^ensse der si vns gar vnd gentzlich verricht vnd gewert habent mit bereiten pfening zu vnserr anligender notdurft, der wir anders nicht verziehen mochten. wir sullen auch des saczes ir gewer sein fu^er alle chrieg vnd ansprach nach lantzrecht. Taet wir dez nicht vnd naemen si dez dhain schaden, den su^ellen wir in ausrichten vnd daz sullen si haben auf aller vnser hab wo wir di haben. Daz in daz also staet vnd vnzerbrochen behalten werd, geb wir den brief versigelten mit dez obgenanten Hainrichs dez Prevhavens vnd hern Chunratz dez Sazzers sein swagers anhangunden insigeln, vnd zu ainer guten geziuchnůsse mit dez erbern ritters insigel hern Hans dez Schekhen zu der zeit purkgraf ze Steir mit dez hant der satz geschehen ist, vnd ist geschehen, do man zalt von Christi gepůrtt drewtzehenhundert iar vnd in dem sehs vnd fu^enfczichistem iar an sant Gilgen tach.

Source Fulltext: OÖUB 7 (Wien 1876) S. 473, Nr. 466