Ich Hans pfarrer ze Altenliechtenwart, ich Paul der Tungozzinger ich Philipp dez Tungozzinger aydem, ich Lebay sein hausfrow ich Katrey di Lertzinn vnd alle vnser erben veriehen offenbar mit dem brif allen den di in sehent oder lesen ho^erent, daz wir mit wolbedachtem mu^et nach vnser freunt rat vnd gunst recht vnd redleich ze chauffen haben geben dem erwirdigen weysen geystleichem herren abbt Erharten ze Gaersten vnd dem conuent daselbs in di oblay daz gu^et ze Mo^ederlinch daz vreys aygen ist mit allew dew vnd darzue geho^ert ze holtz vnd ze veld, versu^echt vnd vnuersu^echt, vmb einen gelt dez wir gewert sein, wir sein auch dez vorgenanten gu^etz ze einem rechten vreyn aygen ir gewer wo in dez not geschiecht als lantz recht ist. Ging aber in an der gewerschaft icht ab oder daz in dhein chriege davon auferstu^end von wem daz war, den schullen wir in gantz vnd gar awzrichten an allen iren schaden, vnd nement si dez darvber dheinen schaden, den schullen sew haben auf vnsern trewn vnd darzw^e auf aller vnser hab swo wir di haben versu^echt vnd vnuersu^echt. Daz di red sta^et vnd vntzebrochen beleib, darvber geben wir den brief gesigelten ich Jans ich Paul ich Philippe mit vnsern anhangunden insigeln vnd mit vnsers lieben pru^eders Fridreichs dez vngelter anhangunden insigel der daz an hat gelegt durch vnser pet willen zw einer zewgnuzze im an schaden, darhinder ich mich Katrey di Lertzinn verpint mit meinen trewn allez daz sta^et ze behalten daz oben verschoben stet, wand ich nicht insigels han, der geben ist nach Christez gepu^erd dreutzehen hundert jar vnd in dem siben vnd funfftzigistem iar an sand Michels abent.

Source Fulltext: OÖUB 7 (Wien 1876) S. 530f., Nr. 521