Ich Vlreich der Saenftel vnd ich Fridreich sein pruder wir vergehen vnd tu^en chunt allen den die disen brief lesent oder ho^erent lesen di nu lebent vnd hernach chu^enftich sind, daz wir mit vnser erben gutem willen vnd gunst mit verdachtem mut vnd auch zu der zeit do wir ez wol getun mochten vnd mit vnsers perchmaisters hant hern Eberhartz dez Beraitter von Tulln zu den zeiten schaffer vnd phleger der gaistlichen vrown gut da selbens ze Tulln verchauft haben vnsern weingarten gelegen an der Hohenwart, dez ein halbs ieuch ist ze na^echst Nichlas weingarten dez Tischler, da man von dem egenanten vnserm weingarten alle iar dient den gaistleichen vrown ze Tulln prediger ordens anderthalben emmer weins ze perchrecht vnd drey helbling ze voitrecht vnd nicht mer. Den vorgenanten weingarten haben wir recht vnd redleich verchauft vnd geben mit alle dem nutz vnd rechten als wir in vnuersprochenleich in perchrechts gewer herpracht haben, vmb fu^emf vnd dreizzich phunt wienner phenninge der wir gar vnd gaentzleich gewert sein, den erbern gaistleichen herren apt Erharten ze Gaersten vnd dem conuent gemain daselbens vnd allen im nachchomen fu^erbaz ledichleich vnd vreileich ze haben vnd allen irn frumen da mit ze schaffen verchauffen versetzen vnd geben swem si wellen an allen irresal, vnd sein auch wir ich Vlreich der Saenftel vnd ich Fridreich sein pruder vnd vnser erben vnuerschaidenleich dez vorgenanten weingarten der egenanten erhern gaistleichen herren gemain ze Ga^ersten vnd aller irr nachchomen recht gewern vnd scherm fu^er alle ansprach als perchrechtes recht ist vnd dez landez recht ze O^esterreich. Waer aber daz si fu^erbaz mit recht an demselben w icht chrieges oder ansprach gewunnen von wem daz waer, swaz si des schaden nement, daz suln wir in allez auzrichten vnd widerchern an alle ir mu^ee vnd an allen irn schaden vnd suln auch si daz haben auf vns vnuerschaidenleich vnd auf allem vnserm gu^et daz wir haben in dem lande ze O^esterreich wir sein lebentich oder tode. Vnd daz diser chawf fu^erbaz also staet vnd vnzerbrochen beleibe, vnd wand wir selber nicht aigner insigel haben, darvmb so geben wir in disen brief zu einem warn vrchunde vnd ze einer ewigen vestnung diser sache versigilten mit des perchmaisters insigil dez vorgenanten hern Eberharts dez Beraitter von Tulln vnd mit hern Hainreichs insigil dez Puchueller zu den zeiten amman vnd phleger der Schotten gut ze Wienne vnd mit hern Vlreichs insigil dez Gu^entzpurger des schreiber, die wir dez vleizzichleich gepeten haben daz si irev insigil ze einem gezewg an disen brief gehangen habent. Vnd verpint auch wir vns mit vnsern trewn vnder irev insigil allez daz ga^entzleich staet ze haben vnd ze laysten, daz vor an disem brief geschriben stet. Der brief ist geben ze Wienne nach Christes geburt drewtzehen hundert iar darnach in dem syben vnd fumftzgisten iar an sande Jacobs abent.

Source Fulltext: OÖUB 7 (Wien 1876) S. 518f., Nr. 511