Ich Wirnhart der Steger vnd ich Margret sein hausfrawe vnd mit vns alle vnser erben swi di genant sint vergehen mit dem offen brief, daz wir mit wolbedachtem můt vnd mit gu^etlichem willen ze chauffen haben geben Hansen von Halle purger ze Steir vnd allen sein erben vnser hu^eeb ze Go^eritz in Warberger pfarr gelegen mit allev dev vnd darzu geho^ert swi daz genant ist, besucht oder vnbesucht, mit herren hant, di vnser lehen ist gewesen von den fu^erstn in Osterreich, vmb zway vnd dreizzich pfunt wienner pfening der si vns gantz vnd gar verricht vnd gewert habent mit beraiten pfening. wir sullen auch dez chauffes ir gewer sein fu^er alle ansprach nach lantz recht, vnd dez verpint ich mich Chunrat der Sintzendorffer mitsamt in, vnd daz sullen si haben aůf vns vnd auf vnsrer hab. vnd dez zu aim vrchu^end geb wir ped Wirnhart Steger vnd Chunrat Sintzendorffer den brief versigelten mit vnsern insigeln. Daz ist geschehen, do man zalt von Cristi gepu^ertt dreuzehen hundert iar vnd in dem acht vnd fu^enftzichistem iar an dez heiligen Chru^etzes tag als ez funden wart.

Source Fulltext: OÖUB 7 (Wien 1876) S. 576f., Nr. 564