ICH Velreich der anhanger¹⁾ vnd ich hertneid der hawnsperger vnd mit vns all vnser erben Wir veriehen mit dem offenn prief allen den, di in sehent oder ho^erent lesen, daz wir daz guet in dem Chraniwittech in Stainpekcher pfarr gelegen, daz vnser vreyz aigen gewesen ist, ze chauffen gegeben haben dem erwirdigen geistleichen herren Abpt Niclan ze Gersten vnd seinem gotshaus daselb mit aller seiner zuegeho^erung vmb ein gelt, des wir gantz vnd gar von im vnd seinem gotshaus gerichtt vnd gebert sein ze rechtten taegen. wir wellen vnd schu^ellen auch des egenanten guets sein vnd seins gotshaus rechtt gewern sein, als aigens . . . ist vnd Lants recht ob der enns. wer aber, daz im vnd seinem gotshaus . . . guet vnd and (sic) der gewerschaft icht abgieng mit dem recht vnd . . . seins gotshaus gewern wern, waz sew dann dez schaden na^emmen, den er oder seins . . . s ainer pei seiner gewizzen gesprechen mag, den selben schaden schu^ellen sew haben auf aller der hab, di wir haben, wie di genant ist oder wo di gelegen ist, vnd dauon pecho^emen mit vnserm guetleichen willen an all vnser irrung vnd widerred. Wer aber, daz yemant cha^em, der des guets erib wolt sein, Der schol dem obgenanten Abpt vnd seinem gotshaus vier vnd zwaintzk pfunt wiener pfening geben vnd schol dann daz guet Ledig sein von ym vnd seinen gotshaus. Daz daz allso stet vnd vnuerchert weleib, dar v^eber gib ich obgenanter Vlreich der anhanger den prief versiglt mit meinem anhangunden jnsigel, vnd zu einer pezzern sicherhait versiglt mit des erbern weschaiden Maricharts des Slu^ezzelberger anhangunden jnsigl, darvnder ich mich egenanter hertneid der hawnsperger verpint mit meinen trewn allez daz stet ze haben, daz an dem prief geschriben stet, wann ich zder zeit aigens jnsigls nicht het, vnd versigelt mit der erbern zwaier helmharts des anhanger vnd wolfharts des Sintzendarffer anhangunden jnsigln, damit sew getzeug sind in vnd all irn erben an schaden. Der prief ist gegeben nach christi gepu^erd drewtzehen hvndert jar, darnach in dem Aechtt vnd Sibentzkisten iar an sand Michestag (sic).

Source Fulltext: OÖUB 9 (Wien 1906) S. 505-506