Ich Chunrad der Vischer purger ze Chrems vnd ich Chunigund sein hausvrowe vnd alle vnser erben wier vergechen vnd tu^en chunt offenleich mit dem prief allen den die jn sechent oder ho^erent lesen, daz vns der erwierdig geustleich herre abpt Hainreich vnd di sambnung der bruederschafft dez gotzhaws ze Glunich mit gemainem rat vnd gutleichem willen verchaufft vnd geben habent iers gotzhaws aygen ein halbs jeuch weingarten gelegen am Chueperg pey vnserm waingarten vnd do man alle jar von geyt ze purchrecht vier phening an sand Mychels tag dem erbern mann Nyclasen dem Du^errnpechken zu den zeiten pu^erchkgraff ze Rechperch oder aim igleichen purchkgraffen daselbs mit allen den nutzen vnd rechten, alz si vnd ierr goczhaws daz selb halb jeuch weingarten vo^er inne gehabpt habent, vmb sechs phunt phening wienner munzz also beschaidenleich, di weil wier jn der nicht geben so schullen wier jn jaerleich immer acht tag nach sand Mychels tag raichen vnd geben auz dem selben weingarten oder auz andern vnsern weingarten vier emmer mostes in iern hof ze Chrems, vnd wann wier die versaezzen so schullen si vns mit vnserm gutleichem willen pfentten auf aller vnsers (sic) hab die wier haben in dem lant ze O^esterreich. Wann wier jn vnd ierm gotzhaws aber geben sechs pfunt wienner phennig, so sind die vo^ergenanten vier emmer mostes ab in welichem jar daz sey an sand Mychels tag. Vnd schullen si dez vo^ergenanten weingarten vnser rechter gewer vnd scherm sein nach dez landes recht in O^esterreich. Daz die red paydenthalben staet beleib vnd dez ze v^erchu^end geben wier jn den offen prief versigelten mit dez vo^ergenanten perchherren jnsigel Nyclas dez Du^errnpechken, den wier darvmb gepeten haben daz er der sach geczeug sey mit seim anhangundem jnsigel jm an schaden, wann ich obengenanter Chunrad der Vischer zu der zeit aygens insigels nicht gehabpt han. Der geben ist nach Christes gepu^erd drevtzechen hundert jar darnach in dem syben vnd fu^enftzkisten jar an sand Thomans tag.

Source Fulltext: OÖUB 7 (Wien 1876) S. 540, Nr. 530