Ich Agnes von Tehenstain^a3 vergich und tuen chunt allen den, di disen prief lesent oder ho^erent lesen, di lebentdich sint oder her noch chumfdich werdent, daz ich mit verdachtem muet und mit gesamter hant und mit aller meiner erben willen und gunst zu den Zeiten, do ich iz wol getuen mo^echte, und ze aller voderist durch Got han gegeben den erberigen prudern dotz Paden sand Augustinz orden einen Weingarten, der do leit pei der pharre und haizzet di Muem⁴, zu einem ewigen jartag meiner sele und meinez pruder Haidenreichez des Tehenstainer selle und unser vodern, also beschaidenleich, daz ich den vorgenanten weingarten schol in geber haben untz an meinen tot. So schol er dan gevallen auf daz vor genant chlo^ester ze Paden und den^b vorgenanten prudern sand Augustins orden. Wer awer daz, daz ich den vorgenanten weingarten vor no^etichait muest verchauffen, dez ich Got nicht getraube, so schullen mich di vor genanten pruder an nichteu irren. Man schol auch den vorgenanten jartag begen des nasten tagez noch sand Lucas tag dez abendez mit vigili und dez morgens mit selmessen und mit vier scho^enen chertzen. So schol auch der prior, der zu den zeiten phleger ist, den vorgenanten prudern dez abendez und dez morgens pezzern ir phru^enet mit zwain essen und igeleichem geben ein semel und gu^etez weinz genug. Und daz die red stet und unzebrochen beleib, doruber gib ich vorgenanteu Agnes von Tehenstain meinen offen prief, versigelt mit meinz vorgenanten pruders Haidenreiches^c des Tehenstainer insigil und hern Leutoltz von Alacht des forstmaister insigil und hern Hainreichez von Paden insigil, di diser sach gezeug sint. Der prief ist gegeben, do von Christ gepu^erd woren ergangen treuzehen hundert jar, dar nach in dem zwai und dreizegistem jar an sant Michels tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 115-116.