Ich Hainrich von Chranichperch und ich Elsepeth sein hausvrowe, wir veriehen und tun chunt allen den, die disen prief lesent oder horent lesen, die nu lebent und hernach chunftich sint, daz wir mit unserr erben guten willen und gunst, mit verdachten mute und mit gesampter hant nach unserr pesten vreunde rat zu der zeit, do wir ez wol getun mochten, recht und redelichen verchauft haben dem erbern herren hern Fridreichen von Chreuzpach und seinen erben unsers rechten aygens achtzehen schillinge Wienner phenning geltes und funftzehen phenninge geltes, die da ligent ze Paden in der Alachgazze¹ auf behausten holden und swaz darzu gehoret ze holtz, ze velde, ze dorffe, gestift oder ungestift, versucht oder unversucht, swie so ez genant ist, mit allem dem nutze und rechte, als wir die vorgenanten gulte unversprochenlichen in aygens gewer herpracht haben, umb dreizzich phunt phenninge und umb dreizzich phenninge Wienner muntze, der wir gar und gentzlichen verricht und gewert sein, und die er gechauft und geben hat ze ainem ewigen selgerete den erbern gaistlichen leuten pruder Vlreichen zu den Zeiten prior ze Paden augustiner ordens und dem convent daselbens und allen iren nachchomen, furbaz ledechlichen und vreilichen ze haben und allen iren frumen damit ze schaffen, verchauffen, versetzen und geben swem sie wellen, als in daz wol chom und fuege, an allen irresal. Und durch pezzer sicherhait so setzen wir uns, ich vorgenanter Hainrich von Chranichperch und ich Elsepeth sein hasvrowe, unverschaidenlichen mit sampt unsern erben dem egenanten pruder Vlreichen dem prior und dem convent ze Paden und allen iren nahchomen ze rechtem gewern und scherm fur alle ansprache uber die vorgenanten gulte, als aygens recht ist und des landes recht in Osterrich. Und daz der chauf und dise rede furbaz also stete sei und untzebrochen beleibe, daruber so geben wir dem prior und dem goteshaus ze Paden disen prief ze ainem offen urchunde und gezeuge und ze ainer ewigen vestunnge, versigilten mit unserm insigel und mit der erbern herren insigeln unser guten vreunde hern Vlreichs des Tursen², hern Otten von Haselawe und hern Vlreich von Pergowe, die diser sache gezeuge sint mit iren insigeln, und ander erber herren genuch. Diser prief ist geben ze Wienne nach Christes geburt dreutzehenhundert jar, darnach in dem vier und dreizzigistem jar, an Unser Vrowen abent der liechtemesse.

Source Fulltext: MAURER, Augustiner-Eremiten Baden (=FRA II/89, Wien 1998) S. 120-121.