Ich Hedewig, herrn Engeldichs^a wittibe von Kreusbach^b, dem Gott genad, vergich unnd thue kundt allen den, die diesen brief lesen oder hören lesen, die nun leben unnd hernach künfftig sein, daß ich mit meines aidams herrn Hainrichs von Schwandeckhe^c unnd frawen Agnesen seiner haußfrawen, meiner tochter, guetem willen^d unnd gunst aller meiner erben mit verdachtem muthe lauterlichen durch Gott, meiner seelen, meines vorgenannten würths seelen unnd aller meiner vordern seelen zu hülf unnd zue trost zue der zeit, da ich es wol gethuen mochte, recht unnd redlichen geben unnd gemacht han nach meinem tode zu ainem ewigen seelgereth den erbaren geistlichen leuthen brueder Gerhardten, zu den Zeiten prior zu Baden sanct Augustins ordens, unnd dem convent daselbst unnd allen iren nachkhommen meinen weingarthen, der da leit zu Baden an dem Khaltenberge unnd heißet der Herzog^e, da man von dienet alle jahr ainen aimer weins zu perchrecht im lesen unnd nicht mehr, so beschaidenlich, daß mir dieselben herrn von den augustinern zu Baden bey meinem lebendigen leibe lediglichen alle jahr zu rechtem leibgeding dienen sollen zway pfundt Wiener pfenning unnd ainen dreyling weins an sanct Michaels tage unnd alle jahr sechs pfundt öels in der fasten unnd neun fueder holz, drey fueder sommer zeit unnd sechs fueder holz winter zeiten, unverzogenlichen unz an meinen todt in allem dem rechten, alls ich besonderlichen iren brief darüber han, versiegleten mit des vorgenannten prior insiegel brueder Gerhardts^f und irem convent insiegl unnd ires provincial insiegel, unnd nach meinem todt, wie sie dan denselben weingarten finden mit paw, mit alle, also sollen sie sich sein zuhand underwinden^g ohn alle widerred, unnd auch also mit ausgenommener rede, daß sie auch fürbaß nach meinem todt Schwester Alheiden, meiner tochter, hinz Sanct Lorenzen in das frawen kloster zu Wien lediglichen alle jahr davon dienen sollen drey pfundt Wiener pfenning gelts purchrechts zu dreyen zeiten in dem jahr zu beßerung ihrer pfründt in allem dem rechten, alls man annder purckhrecht dienet in der statt zu Wien, unverzogenlichen unz an iren todt, unnd nach irem todte so sollen sie fürbaß mit dem vorgenannten weingarten lediglichen unnd freylichen allen iren frommen schaffen, verkhauffen, versezen unnd geben, weme sie wollen, ohne allen irrsal, unnd bestettige ihn denselben weingarten mit meines perckherrn hand herrn Johannsen von Manswerde, obrister kellermaister der herzogen zue Österreich^h, nach meinem todt lediglichen unnd freylichen zu haben in allem dem rechten, alls ich in unversprochenlich in perckhrechts gewehr herbracht han unnd vor an diesem brief geschriben stehet. Unnd daß diese red fürbaß allso stät seye unnd unzebrochen bleibe, darüber so gib ich ihn diesen brief zu ainem offnen urkhund unnd gezeuge unnd zu ainer ewigen vestunge, versieglten mit meinem insigel unnd mit des vorgenannten meines perckherrn insigel herrn Johannsen von Manswerde unnd mit herrn Friderichs insigel von Khreuspachⁱ unnd mit des vorgenannten meines aidams insigel herrn Hainrichen von Schwandeckh unnd mit Wernhardts insigel von Chreuspach^j, die dieser sachen gezeug seind mit iren insiegeln, unnd ander erbar leuth genueg. Dieser brief ist geben zu Wien, nach Christus geburth dreyzehenhundert jahr, darnach in dem sechs unnd dreißigisten jahre^k.

Source Fulltext: MAURER, Augustiner-Eremiten Baden (=FRA II/89, Wien 1998) S. 124-126.