Ich Hainreich der Amman van Ra^vhenwort und ich Hedweich sein hausfrau und all unser erbn, wier veriechen und tuen chunt all den, die den prief lesent oder herent lesen, di nu lebent oder hernach chunftig sint, daz wier unverschaidenchleich mit verdachten muet, mit gesamenter hant und mit guetleichen willen zu der zeit, do wier iz wol getuen machten, den erbern gestleichen herren prueder Steffan^a, zu den zeiten prial zu Padden sand Augenstins orn‚ und der samnung gemain do selbs verchauft haben czwen und dreizich mezzen waiz guelt aller ierichleic zu dienen um czwelf phunt Wiener phening, der wier recht und redleich gewert sein, und dorumbe schul wier in die vorgenannten^b cwen und dreizich mezzen waiz alle iar unverzogenchleich dienen in ir claster hin zu Unser Froen zu Padden an sand Gilgentag. Und schuellen seu die egenantten waiz gu^elt haben auf aindlef ieuchart achirs, di unser rechts purchrecht sint, der cwo ieuchart ligent im Sikental und dienent hinz sand Mariamagdalen chirchen¹ nimer den acht phening, und sechs ieuchart ligent zu nast am dorff^c, di dient der vargenanten chirchen nuer dreizehenthalben pheninch, und ligent czwa ieuchart am Hocholt, di der oftgenanten chirchen^d dient nuer ain pheninch zu cins al iar; daz aindleft ieuchart leit an Manswerder weg, van dem man auch nuer ain pheninch dient sand Mariemagdalen^e. Auf denselben echern, di benent sint, schuel die vargenant herren di Augenstiner zu Padden haben di waiz guelt an all ansprach und waz in doran verzogen wirt nacht des landes recht zu Osterreich. Und daz di wandlung also stet und unzebrochen beleib^f, wan ich Hainreich der Amman selb nicht aigens insigels han, dorumbe gib ich in disen prief zu einir offen urchind und zu einem waren gezeugen diser sach, versiglt mit dez erbern herren insigl des Werenharts Chreuzpechen, der irr Stifter ainer ist², der ist des^g chauff und^h der wandlung gezeug mit seinem insigl. Iz sint auch dez selben gezeugenⁱ di erbern leut Werenhart zu den ceiten richter in dem selben darf zu Rauhenwort und haizt der Ratgeb, Rapott der Stifter, Hainreich Wolfolt, mein Hainreichs Ammans aidem, Niclas der Panzcier zu den zceitem (sic!) czechmaister, Irenfrid van Malastorf, Ott dez Ammans prueder, Jans sein neff und ander frum leut genueg, den di sach wol chunt ist. Diseu sach ist geschehen, do van Christ gepuerd warn ergangen tausent iar und drehundert iar, und da nach in dem acht und dreizigsten iar, an sand Georgen tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 127-128.