Ich Elzpet di Neundorfferin und ich Margret die Cheuschin ier gespil, wier veriehen und tuen chunt allen den, di den prief lesent oder hoerent lesen, di nu lebent oder hernach chunftich sind, daz wier mit guetleichen willen und mit verdachten muet^a und zu der czeit, do wier iz wol getuen machten, recht und redleich gemacht und geschaft haben, lauterleich durch got und durch unserr sel willen und durch aller unserr vodern sel willen und ze trast allen gelaubigen selen, nach unserr paider tode den erbern gestleichen herren den pruedern ze Paden sand Augenstins orden unsers ledigen und unverchumerten^b guetes einen weingarten, den wier haben gechauft um unserr ledigz guet und leit an dem Flachen Hord^c1 ze nast oberthalb des weingarten, der di czeit was Georgens in der Helle², van dem man dienet alle jar cwainzich phening und nicht mer an sand Michels tag dem erbern edeln herren hern Jansen dem iungen van Puechaim, hern Hainreichs su^en van Puechaim, dem Got genad³, also beschaidenleich, daz di egenanten prueder den vorgenanten Weingarten unverchumert schullen behalten ewichleich pei irm chloster mit allem den rechten, als wier in puerchrechtes gewer und nuzz gehabt haben, und schullen uns dorum begen einen ewigen jartag alle iar des nasten mantags nach Unser Wrauen tag zu der Liechtmess des obendes mit vigili und des morgens mit selamtt und mit anderm gepett, als irs ordens gewanhait ist, und schullen auch des selben tags, als man uns heget den iartag, di zu den czeiten prial und schaffer sind irs chlosters ze Paden, der samnung der prueder all geman einen mal pezern ir phrent mit ezzen und mit trinchen, also daz si unser dester pazz und vleizichler gedencht (sic!), und schullen den zu dem selben mal allen den pruedern, di zu den zeiten dohaim sind in irm chloster ze Paden, igleichen prueder, der priester ist, drei phenning gebn^d Wienner munz und igleichen, der nicht priester, czwen. Wan aver si^e daz nicht tuent, als vorgescriben stet, so schulen di pruder irs ordens, di Augustiner ze Wiennen, sich des vorgenanten weingartens underwinden und in furbaz^f behalten an all widerred mit dem selben rechten, als er den pruedern ze Paden geschaft ist, und daz selb do van begen, daz vor gescriben stett; iz sei dan so vil, ob di egenant prueder ze Paden ze hant ervollen an all aufschub, waz si versamt habent, donach und man seu ermant mit irm prief, so schol in der vorgenant weingart beleiben. Und daz daz gescheft also stett und ewig beleib, wan wier vorgenanten Elzpet di Neundorfferin^g und Margret di Cheuschin nicht aigener insigel haben, dorum so geb^h wier in disen prief zu einer ewigen urchuend diser sach, verinsigilt mit der erbern herren insigel hern Wilfings van Scheichenstain und hern Dietreichs van Ebentalⁱ⁴, di des geczeug sind mit irn insigell. Iz sind auch des geczeug ander fruem leit genueg an insigel^j, den di sach chunt ist. Der prief ist gegeben nach Christes gepuerd uber dreuzzehen hundert iar‚ darnach in dem neun und vierzgisten iar, an sand Jacobs tag des merern in dem arn.

Source Fulltext: MAURER, Augustiner-Eremiten Baden (=FRA II/89, Wien 1998) S. 161-163.