Ich pruder Symon zw den Zeiten prior datz Paden¹ sand Augustins orden und der convent da selbs gemain veriehen und tuen chunt all den, die disen prief sehent oder horent lesen, di nu lebent oder hernach chunftich sind, daz wir enphangen haben vier phunt phenning Wienner muns von dem erbern herrn herrn Hainreich von Walse datz Entschesveld² umb ain ewigen iartag ze hilf und ze trost frawn Alhayten sel von Walse³, di sein an gewesen ist und gesezzen ist gewesen datz Lestorf⁴, und hern Fridreichs⁵ sel, der ir wirt gewesen ist, und durch herrn Hainreichs selig sel von Walse von Entschesveld⁶ und durch aller seiner vodern sel und durch aller gelaubhaftigen sel wiln. Wir verpinten uns auch, den iartag ze pegen ewichleich all iar an sand Philipp und sand Jacobs tag⁷ dez nachtez mit ainer gesungen vigilii und mit vier prinnenden chertzen und dez morgens mit ainem gesungen sel ampt und auch mit vier prinnenden stekchertzen nach unsers ordens gewonhait den liben vorgenanten seln ze hilf, ze lid, ze trost. Wer awer daz, daz wir den iartag versaumiten und nicht pegiengen, in welhem iar daz wer, so schol der erber herr her Hainreich von Walse oder sein erben uns zered hayssen setzen ayn erbern (sic!), und volpring wir darnach nicht in den nasten acht tagen, waz wir versaumpt haben alz vor geschriben ist, so sull wir verfallen sein ayn halb phunt phenning, daz sol er geben arm lauten oder auf ayn ander gotshaws, wo in sein andach (sic!) hin laitt, und daz schol geschehen, alz oft wir saumicht werden. Raihit wir awer daz halb phunt phenning nicht nach der saumung und nach den achtagen der monung, so schol der oft genant erber herr her Hainreich von Walse oder sein nachchomen uns phenten mit amptmans hant, wo in lust, ez sey auf weyngarten oder pehaustem guet, daz zw unserm chloster datz Paden geho^ert. Und daz di red stet und unzerprochen peleib, darumb geb wir in disen prief versigelt mit unser payder insigel, dez prior und dez convents. Geben nach Christes gepurd treutzehen hundert iar, darnach in dem trew und sibentzkisten iar an dem palmtag in der vasten.

Source Fulltext: MAURER, Augustiner-Eremiten Baden (=FRA II/89, Wien 1998) S. 200-201