Ich Ulreich der Rigelpekch und ich Anna sein hausvrow und ich Fridreich der Chekch und ich Anna sein hausvrow und all unser erben, wi^er veriechen und tu^en chunt offenleich mit dem prief allen den, di in sechent oder ho^eerent lesen, das wir mit aller unser erben guten gunst und willen und wolverdachtem mut und mit gesampter hant, nach unser nasten und pesten vreunt rat, zu der zeit, do wir es mit recht wol getun mochten, recht und redleich und auch unverschaydenleich verchauft haben unsers rechten ungetailten erib guts fumfczechen jeuchart akchers aygen guts, die gelegen sind dacz Paden²: Des ersten ligent drey jeuchart akcher auf der Huriben^a3 ze nast hern Stephans acker von Zelging⁴, und ain jeuchart akcher stozt auf die hub pey dem Chirichpuchel ze nast der viechtrift und stozt auf Chunrats des Chrens akcher ze Lestorf, und zwo jeuch akcher ligent an dem Chirichpuchel ze nast des Rudleins akcher von Tribeswinchel, dem got genad, und ain jeuch akcher leit zwischen den vi^erdhalb jeuchart akcher, die wir ze purchrecht haben von dem von Polnhaym⁵, und sechs jeuchart ligent nach einander: zwo jeuch ze nast Hainreichs akcher auf dem Weyr ze Lestorf und die vir jeuchart ligent ze nast des chapplans a^ekcher ze Lestorf⁶; so leit ain ger ze nast des Polnhaymer akcher, des ist ander halb jeuch, und ain halb jeuchart akcher leit auch daselbs auf dem Chirichpuchel ze nast des obgenanten Hainreichs akcher auf dem Weir. Die obgenanten fumfczechen jeuchart akcher hab wir verchauft mit alle den rechten und nuczen, als wir sew in aygens gewer ledichleich herpracht haben, dem erbern geystleichen herren pruder Christoffen dem Fauslein, die zeit prior sand Augustins chloster ze Paden, und dem selben covent um acht und zwainczich phunt Wi^enner phenning, der wir unverschaydenleich aller gancz und gar verricht und gewert sein, also beschaydenleich, das der obgenant pruder Christof der prior ze Paden und der covent daselbs die^b obgenanten fumfczechen jeuchart akcher schullen haben fu^erbas vreyleich zu i^erm vorgenanten chloster und allen irn frumen damit schaffen mit verseczen, mit verchauffen, geben wem se wellent an all unser i^errung. Wir sein auch unverschaydenleich all, ich Ulreich der Rigelpekch und ich Anna sein hausvrow und ich Fridreich der Chekch und ich Anna sein hausvrow, des obgenanten Ulreichs swester, und all unser erben des vorgenanten pruder Christoffs, di zeit prior ze Paden, und des covents daselbs sand Augustins orden der vorgeschriben fumfzechen jeuchart akcher ir recht scherm und gewer fur all ansprach, als aygens recht ist in dem land ze O^esterri^ech, also ob in indert ain chrieg oder ain ansprach daran auf stuend, von wem das wer, des se mit recht mochten schaden nemen, den selben schaden schull wir in allen ablegen, ausrichten und widerchern, und schullen si das haben dacz uns unverschaydenleich und unsern erben darzu auf alle dem gut, daz wir haben in dem land ze O^esterreich oder wo wir es haben, es sei erb gut oder varund gut, wi so das genant ist, wir sein lebentig oder tod. Das der chauf und di wandlung fürbas also stet und unczebrochen beleih, darüber geb wir dem oftgenanten pruder Christoffen prior ze Paden und dem selben covent den prief zu ainem waren geczeug und zu ainer vesten stetigung der sach, versigelt mit unsern zwain anhangunden insigiln. Der sach ist auch zeug der erber ritter her Christan der Techenstainer mit seinem anhangunden insigel, wan wir in vleizz(igleichen) dorum gepeten haben, im und seinen erben an schaden. Der prief ist geben nach Christes gepu^erd dreuczechen hundert jar, darnach in dem newn und sybenczigistem jar, an sand Margareten tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 210-212.