Ich Georig der Jung von Phafsteten und ich Christein sein hausvrow^e und alle unser erben, wir vergehen offenli^ech und tu^en chunt alle den, die den brief sechent, lesent oder ho^erent lesen, das wir mit wolverdachtem mu^et, mit gesampter hant, mit gu^etlichem willen und gunst aller unser nechsten erben, zu^e der zeit, do wir es mit recht wol getůn mochten, und mit unsers rechten pergmaisters hant Seyfrids in dem Hochen Haws ze Phafsteten, die zeit pergmaister der erbern geistlichen hern ze Maw^erbach in Allerheiligental des ordens von Carthus, recht und redleich geschafft und gemacht haben ein halbs phunt Wienner phenning gelts purchrechtes auf unserm weingarten gelegen ze Phafsteten und haizzt das Selgret^a, ze nechst des pharrer von Trautmanstorff weingarten, der genant ist der Stu^echs¹, von denselben egenanten unserm weingarten man vor aus jarrlich dient den egenanten geistlichen herrn ze Maw^erbach ain viertail weins ze rechtem perchrecht in dem lesen unvertzogenlich vor dem weingarten und nicht mer. Dasselb vorgenant halbs phunt Wienner phenning gelts auf dem egenanten unserm weingarten haben wir geschafft und gemacht den erbern geistlichen pru^edern den augustinern ze Paden und allen i^ern nachkomen pru^edern daselbens zu^e einem ewigen selgret, also beschaidenlich das wir oder wer den obgenanten u^ensern Weingarten nach u^ens besitzt oder innehat den egenanten geistlichen pru^edern den augustinern ze Paden ewichleich davon das obgenant halbs phunt Wienner phenning gelts purchrechtes dienen und raihen su^elln alle iar jerlich des mittichen in den quottembern vor weichnachten, als anders dienstes und purchrechtes recht ist in dem lannde ze O^esterreich. Und wenn der dienst versezzen und nicht gedient wirt ierleich zu^e der zeit, so ebenant ist, so habent si voln gewalt und recht, mit willn und hilff des egenanten perchherrn, des prior und der geistlichen hern von Maw^erbach oder irs pergmaister, daz si sich des vorgenanten unsers weingarten underwinden an alle chlag und an alles berechten mit unserm gu^etlichem willen, so verr und als lang untz si irs versezzen dienstes gantz und gar verricht und gewert werden an allen i^ern schaden. Und darumb so su^elln die vorgenanten erbern geistlich pru^eder die augustiner ze Paden fu^erbas ewichleichen alle iar ierichleich des vorgenanten mittichens in den quottembern vor weichnachten unser und unserr vorvordern und nachko^emen erben ein ewig gedechtnuzz haben mit einem ewigen iartag in irm chloster ze Paden nach irs ordens gewonheit, also daz si des nachtes su^elln singen ain vigili und des morgens ein selampt got ze lob und unsern seln und allen gelawbigen seln ze hilff und ze tro^est. Auch wann man den iartag beget ierichlich, so sol der prior oder der schaffer des vorgenanten chloster denn des selben tags yedm pruder geben unverczogenlichen drei Wienner phenning, als verr und si mit den halben phunt phenningen gelangen mu^egen, und swelhs iares si des vorgenanten jartags nicht begiengen und der vorgenanten phenning den prudern nicht engeben, als vor an dem brief geschriben stet, so su^elln wir und unser erben in des vorbenanten halben phunt phenning gelts purchrechtes auf unserm vorgenanten weingarten fu^erbas nicht mer phlichtig sein ze dienen und su^elln denn ich egenanter Georig der Jung und ich Christein sein hausvrow^e und alle unser nachkomen erben, die den vorgenanten unsern weingarten nach u^ens besiczent und innehabent, daz vorgenant halbs phunt geltes purchrechtes auf dem egenanten unserm weingarten machen und geben nach unsern trew^en auf ein ander goteshaw^es, da u^ens des duncht, da es allerpest hin gestat sei, das man den vorbenanten jartag davon bege, als vor an dem brief geschriben stet. Und das daz geschefft und die wandlung fu^erbas also ste^et sei und untzebrochen beleib, wann wir, ich egenanter Georig der Jung und ich Christein sein hausvrow^e, und unser erben aigens insigil nicht haben, so geben wir in, den vorgenanten geistlichen pru^edern den augustinern ze Paden, daru^eber den brief zu^e einem waren sichtigen urchund der sache. versigilten mit des vorgenanten unsers gruntherren insigil des geistlichen hern pru^eder Stephans, die zeit prior ze Maw^erbach in Allerheiligental des ordens von Carthus², den wir darumb vleizz(igleichen) gebeten haben, das er sein insigil an den brief gehangen hat, im und seinem gotshaws an schaden, daru^ender wir uns und alle unser erben verpinden mit unsern trew^en, alles daz stet ze haben und ze laisten, daz vor an den brief geschriben ist. Der sach ist auch zeug der erber ritter herr Christann der Tehenstainer mit seinem anhangunden insigil, den wir auch vleizz(igleichen) darumb gebeten haben, im an schaden. Der brief ist geben nach Christi gepu^erd drewtzehenhundert iar, darnach in dem vier und achtzgistem iar, des nechsten montags vor dem auffert tag.

Source Fulltext: MAURER, Augustiner-Eremiten Baden (=FRA II/89, Wien 1998) S. 216-218.