Ich Gorig von Sand Lienhart aus dem Varst¹, di zeit gesell und schaffer des erbern herren hern Andres des Chrumicher, beilent pharrer zu Zwetel, bekenn offenlich vor aller ménichleich gegenbuertigen und kunftigen mit dem brief, di in sechent, lesent oder horent lesen, das mír von sundern genaden und vleissiger pet wegen Michel, di zeit ambptman der stat dacz Zwetel des ernbírdigen edlen herren hern Ruedolfs von Liechtenstain, der gancz rat und di gancz gemayn der selben stat wissendlich verlichen habent ír spital daz Sand Merten, gelegen vor der stat bey dem nydern Tar, mit aller séiner zuegehorung, nuczen, rechten und eren, nichcz auzgenomen noch auzgezogen, weder wenig noch vil, als es von alter mit rechten und mit gewonhait her komen ist oder was noch darzú kém, als es ander spitaler vor mír inngehabt habent. Also sol ich dasselb spital inhaben, nuczen und nyessen all mein lebtág allain unczt an den abgang meines leibs, und domit ich mich betragen und besachen sol, als ich pest mag, ungeengt von in und irn nachkomen. Ich sol auch den armen láwten ír phfrunt raychen und geben trewlich und ungevárlích, als es von alter ingewonhait herkomen ist und als es di andern spitaler getan habent, und ob das zu schulden kem, das ich als chrankch und als sích wuerd, das ich dasselb spital nicht verbesen mocht oder wolt, so hab ich des freyew wal und vollen gewalt, das ich aynen zu mír nym, wen ich wil, der alles das volpringt und volfuert, das ich selber tát oder tan hiet, ob ich gesunt wár, und wann das ist, das ich mit dem tad abge, was ich dann von dem obgenanten spital geuebrig und hinder mír lazz, das sol bey dem egenanten spital den armen léwten und duerftigen daselbs angevár beleiben, ausgenómen, was ich wissenlích von des spitals wegen gelten sol, das ich nicht auzgericht hiet bey meinen lebtágen, das sol man dovon ausrichten und gelten. Und darinn sullen sew mich noch ír nachkomen nicht írren noch engen noch chainen ingrif noch invell tuen in dhainer weis, und ob mír yemant invell darinn tuen wolt oder tát, es wár umb gruent oder umb anderlay, das zu dem spítal gehort oder das spital anging, des sullen sew mír vor sein und geholfen in allen sachen, als oft mír des not geschícht, und alles, das vor an dem brief geschriben stet, lub ich in stét ze haben bey meinen tran ungevárlich. Des zu einer warn urkund gib ich in, ich vorgenanter Gorig, den offen brief besigelten mit des erbern herren hern Tamans, beilent kappellan auf dem charner Sand Johanns gocztawffer zu Zwetel und gesell der pharrchirichen daselbs, anhangundem insigl, ym und seinen nachkomen an schaden, und auch mit des erbern manns insigl Ulrereichs des Schestawer von Syrichenfeld², ym und seinen erben an schaden, dew ped ich vleich [!] gepeten han, das sew der sach zewg sind mit íren peden anhangunden insigeln, wenn ich dew zeit aygens insigls nicht gehabt hab. Der brief ist geben do man zalt von Christi geburd vírczehenhundert iar darnach in dem andern iar an an [!] Sand Peters und Sand Pauls tag der heyligen zwelifpoten.