Leonardus Dei gratia episcopus Patauiensis universis et singulis presentes nostras litteras inspecturis salutem in Domino. Ad perpetuam rei memoriam cultus divini augmentationem ac egenorum pauperum relevationem ex iniuncto nobis pastorali officio, quo Dei dispositione presidimus, quantum nobis ab altissimo conceditur, libenter procuramus atque ad ipsorum progressum effectivum nostre confirmationis munificentiam attentius impartimur. Cum itaque honesti in Christo sincere dilecti cives ac tota communitas opidi in Zwetl nostre diocesis zelo devotionis accensi pro divini cultus augmento pauperum quoque et egenorum sustentationum quoddam hospitale dudum ante fores dicti opidi inceptum, modo infra eiusdem opidi septa translatum, cum quadam missa in eodem hospitali sex diebus ebdonidatim [!] per quendam sacerdotem honestum nobis et successoribus nostris per plebanum ibidem ad electionem tamen civium prefatorum presentandum perficienda aliquibus possessionibus, censibus et redditibus sub certis modis et capitulis fundaverint, dotaverint et erexerint consensu et voluntate dilecti in Christo fidelis Georgii plebani et decani nostri ibidem ad id legittime interveniente, sicuti ea in litteris fundationis et erectionis coram nobis productis clarius vidimus contineri, supplicantes nobis humili precum instantia, quatenus hospitalis et misse pretactorum erectionem, institutionem et dotationem ratificare, approbare atque auctoritate nostra generosius confirmare dignaremur. Nos vero, qui eiusmodi cultus divini amplitudinem ac pauperum egenorum sustentationem nostris temporibus adaugere cupientes vota suplicantium in Domino commendamus, eisdem favorabiliter annuentes institutionem, erectionem, fundationem et dotationem ac omnia et alia in ipsis litteris contenta de predicti plebani scitu et voluntate ex certa scientia et auctoritate nostra ordinaria harum serie in Dei nomine approbamus et confirmamus, volentes ea perpetui roboris habere firmitatem harum testimonio litterarum. Datum Wienne quarta die menis Martii anno Domini millesimo quadringentesimo quadragesimooctavo.

Source Fulltext: Transkription und Regest: Mag. Klaus Birngruber, Dr. Herwig Weigl