Ich Barbara Mulbangerinn, Andree des Awer séligen witib, vergich fúr mich und all mein erben und tún kund offenleich mit dem brief, daz ich mit wolbedachtem muet nach rat meiner pesten und nachsten freunt gunst, willen und wissen zu der zeit, da ich daz recht und redlich wolgetún macht, durch mein und meines lieben vater und múter, auch aller meiner vorvardern und aller meiner nachkómen selen und durch meins lieben mannss seligen sel und durch aller gelaubigen selen hails willen den armen durftigen leuten in dem spital der stat zu Zwetel gegeben und gewidembt hab, gib und wydemb auch wissentlichen in kraft dez briefs meins rechten freyn aigens guets, ain guet genant im Bluemech, gelegen in Sand Thamans pharr, davon man ierleich dínt an unser lieben Frawn tag zu irer gepurd ain halbs phunt und siben und zwainczigk phening und nicht mer. Daz obgenant gut im Bluemech gib ich obgenante Barbara Mulbangerinn etc. von datum des briefs ausz meiner hannt, auch ausz meiner nútz und gewér, als ich dann daz unversprochenlich in stiller nucz und gewer herbracht und innegehabt hab, mit aller gerechtichait, als von alter herkómen ist, den erbern und weisen richter und rat und dem spitalmaister daselbs und allen íren nachkomen zu dem obgenanten spital zu Zwetel gantz ledigchlich in ir núcz und gewer, und sullen nu hinfur das obgenant guet mit dem obgenan(ten) dinst von datum des briefs innemen und ainem yedem spitalmaister daselbs all iar ierleich ain yeder, der daz obgen(ant) guet im Bluemach besiczt oder hinfur innehat, schol ym davon raichen und geben zu dínst daz obgenant halb phunt dn. und siben und zwainczigk phenning an unser lieben Frawn tag irer gepurd und nicht mer, treulich und ungeverlich, an abgangk ewigkleich, doch in solicher mainung und beschaidenhait, daz ain yeder, der des spitals zu Zwetel dieselb zeit spitalmaister ist und hinfur bevolhen wírt, sich dez obgen(anten) guetz im Bluemách underwinden sol und mag, und sol auch den dinst all iar ierlich davon innémen, so oben verschriben ist, und sol davon alle iar ierlich hinfur ewichklich davon raichen und geben ainem briester, des benanten spitals kapplan ist, zwelif phening und ainem yeden armen menschen in dem selben spital fumf phenning, alles an dem Antlastag, und die ubermasz sol man zu nutz dem spital den armen lewten anlegen zu gedachtnúsz mein und meins lieben manns seligen und unsrer varvordern selen und aller meiner nachkómen selen willen und durch aller gelaubigen selen hail und trostz willen, und ob in dem vertzogen und nicht auszgericht wurdt, als vor begriffen ist, so ist ain yeder spitalmaister, der dann zu den selben zeiten spitalmaister ist, ains iars oder menigerew versawmet und der benanten stift nicht gentzlich nachkem, als oft er dez uberweiset wúrt, als oft ist er vervallen drew phunt waxsz und sol dannoch unverczogenlich erstatten, was er daran versawmet hat, treulich und ungeverlich. Es sol auch chain spitalmaister noch nyemant dem obgenanten guet und ainem yeden, der darauf sitzt, chain laid thun noch beswéren weder mit stewrn noch in chainen andern sachen, sunder sich des benanten dínsts davon benuegen lassen. Sunderwar hab ich mír vorbehalten, das albeg meins nammens der eltist Mulbanger von ainem auf den andern dez benanten guets im Bluemách rechter eribvogt scholl sein und das guet beschiermen vor gewalt und unrechten, wo dez notturft ist, so er pest vermag, und sol ym von dem benanten guet darumb gedienet werden, wer daz besitzt oder hin fur innehat, an dem vorbenan(ten) unser lieben Frawn tag irer gepúrd czu vogtrecht ain hain oder dar fúr drei phening und nicht mer. Es sol auch der benant vogt dem egenan(ten) guet im Bluemach kainerlai ingriff nicht thún noch ainen yeden, der darauf siczt und daz benant gút innhat, weder mit robaten noch mit stewren chains wegs ungeverlich, sunder dez benanten vogthuen davon benuegen lassen, wann daz benant guet als freys aigen mit dem benanten dínst von alter herchomen ist. Und das die gab, widemb und stift hinfur also ewigklich gancz stét und unczebrochen beleib und alle iar ierlich treulich gehalten wert, darumb gib ich obgenante Barbara Mulbangerin, Andree dez Awer seligen witib, den erbern und weisen richter und rat der stat Zwetel und dem spitalmaister daselbs und allen íren nachkomen den brief besigilten mit meinem aigen anhangundem insigel, und zu pesser sicherhait und merer geczeugnusz so hab ich mit sunderm vleisz gepeten mein lieb freunt die edeln Casparn Mulbanger, mein(en) lieben vettern, und Vlrichen den Lewprechtinger, phleger zu Tiernstain¹ auf dem Obernhaws, mein lieber swager, das sy baid íre insigel durich meiner pet willen an den brief gehangen haben, doch yn baiden und allen írn baiden eriben an schaden. Geben an Allerheiligentag da man zalt nach Christi gepurd tausennt vierhundert und in dem acht und viertzigkistem iare.