Wir Fridreich etc. embieten unsern liebn getrew^en . . allen herren rittern und knechten . . den burgermaistern richtern rêten und burgern gemainklich zu Egennburg, Krembs und Stain etc. Wir lassen ew wissen, das Walthesar Oder dem ersamen geistlichn, unserm andechtigen . . dem abbt zu^em Gottweig wider lanndesrecht entsagt, in und seins goczhaus lêut in hangunden ladungen und rechten angriffen und beschedigt, auch ir etlich gefangen hat, darumb wir im in ungu^eeten nichts mit im ze schaffen, die gefangen ledig ze lassen geschriben und teg her fur uns geseczt, ob im auch glaits darzu not sein wurde, das zu geben erboten haben sy zu baiderseit umb ir zwitrecht ze verhoren und versuechen gutlich zu verainen oder nach ainem pillichen ze entschaiden, daruber er sy noch weitter beschedigt und solh unser schreiben veracht. Nwn haben wir unsern getrew^en Hansen Frondacher, unserm haubtman zu Krembs, und Leon Snekennreutter, unserm phleger zu Egennburg, geschriben und bevolhen in mit unsern leutten in unsern urbarn und veldgerichten daselbs zu Egennburg und in unserm veldgericht bei Krembs hilf und beistanndt ze tu^en solhen des egenanten Oder mu^etwillen ze understen. Emphelhen wir ew ernstlich und wellen, das ir des egenanten abbts diener bei ew in unsern egenanten steten wider den vorgenanten Oder und sein helfer ein und ausreitten und enthalten lasset, als offt in des du^erst^a beschiecht, in auch hilf und beistannd tu^et, ob sy ew darumb anlangen wurden uncz auf unser verrer bevelhen, und den obgenanten Oder noch sein mithelfer in den obgenanten unsern steten und euren geslossern ein und auszereiten noch da zu enthalten wider den gemelten abbt noch die sein nicht gestattet in dhain weis, sunder den mit sein mithelffern, ob ir die in unsern stetten und purkfriden oder andern endten ankomet und erlannget, zu recht und zu unsern hannden aufhaltet uncz auf unser verrer bevelhnu^es, etc. Geben zu Wienn an mittechen nach sand Veitstag anno domini etc. LX, unsers kaisertumbs im newnten jare.

Source Fulltext: FUCHS, Göttweig II (=FRA II/52, Wien 1901) S. 523-524