Dem etc. abbt zu dem Gottbeig Fridreich von gotts gnaden Romischer kaiser etc. Ersamer geistlicher, lieber andachtiger! Als die veindt aus Beheim mit aim merkhlichen volkh in unnser furstentu^emb Osterreich zogen sein und das mit rawb prannt huldigung und vahung der lew^et beschedigen, auch das lannd in annder weg swerlich verderbt wirdet, dem aber furzecho^emen und ze fridrung des lannds haben wir zbai tawsent ze rossen und tawsent ze fu^essen auf uns, dich und annder unser prela^etten, die von stetten und unnser urbarleu^et auf zbaÿ monadt aufgenomen,¹ darin dir dann fu^enffundzbaintzigkh phêrt und ain ze fu^essen auszehallden und zu versollden angeslagen sein. Emphelhen wir dir ernstlich und wellen, das du dŷ bemelldten zbai mona^edt unserm getrewen lieben Jobsten Hawser, unnserm chamrêr, den wir zu innemer desselben anslags² geordent haben, auf dieselben funffundzbaintzigkh phêrt und ain ze fussen alle wochen sechsthalb und zbaintzigkh lb. phening fur sold auszrichtest und gebest, damit das zu betzallung derselben funffundzbaintzig pha^erd und ain ze fu^essen gebrauchen mu^eg, und damit nicht vertziehest noch sawmig seist. Wann ob du darinn sawmig sein und wir des schaden nemen wurden, desselben schadens wellen wir uns zu dir und dein gottshaus hollden und davon becho^emen. Davon so tu^e darinn chain annders nicht etc. Geben zu der Newenstatt an freitag sannd Franciscentag anno domini etc. LXXVI, unnsers kaisertumbs im funffundzbaintzigisten jare.

Source Fulltext: FUCHS, Göttweig III (=FRA II/55, Wien 1902) S. 97-98