Ich Jacob der Weidervelder vnd ich Elsbet sein hausfrowe, Ich Vlrich sein prueder vnd ich Alhait sein hausfrowe verihen vnd to^en chunt allen den, die disen prief lesent oder ho^erent lesen, die nv lebent vnd hernah chvnftig werdent, daz wir mit verdahtem mv^et vnd mit gesamter hant, mit vnser erben vnd vrevnt rat vnd gutem willen, ze der zeit, do wir ez wol getv^en mohten, verchouft haben dem erbern herren apt Otten vnd der Samnvnge ze dem heiligen Chreutz vierzechen phvnt gv^elt wienner phening, die gelegen sint ze arnsteten vnd ze Paerchtoltstorf, wan aber der selben vierzehen phvnt gvlt sint fvnf phvnt lechen von vnserm herren dem Hertzogen, dar vmbe haben wir in gelobt, daz wir in die Schullen vz pringen vnd ledich machen, daz si in aigen werden, vnd sol vns dez geholfen sein der vorgenant herre apt Ott, oder swer denne apt datz dem heiligen Chreutz waere, gen den Hertzogen vnd gen vnserm herren dem Chvnig, swenne er ledich wirt. Waer aber, daz wir in dez niht mehten vz bringen, so schullen wir in daz gu^et wider cheren, darumb vns die fvmf phvnt gult sint gevallen, vnd swaz si des guetes in der zeit schaden haben genomen, den schullen wir in wider cheren vnd ab legen nah vier erber manne rat vnd schidvng, der wir schullen zwen nemen vnd och si zwen, swaz die dar vber schident vnd ertailent, daz schullen wir paidenthalben stet haben, vnd durch pesser sicherhait so setzen wir in vnsern hof ze Perchtostorf, der vnser paider ist vnd von den Hertzogen lechen ist, mit allem dem, daz dar zue gehoret, swie ez genant ist, vnd ein setze, die da leit ze Arnsteten zwischen Muschlein dem Juden vnd Leutoltz des Stuerzer, vnd einen weingarten, der da leit ze Perchtoltstorf in der Svmerhagenowe zwischen Offen dem Hetzel vnd Niclasen dem Ritschart, dez selben weingarten perchmaister ist Ditrich pei dem Tor, ze rechtem schierm vnd ze rechter gewer; da schullen si ier gut vf haben, ob wir in die fvnf phvnt gult niht vzprechten. Vnd daz dise red vest stet vnd ouch vnzebrochen beleib, dar vmb geben wir in disen prief mit vnser paider Insigel ze einem waren gezevg vnd ze einer sichtigen vrchvnd diser sach, vnd ouch mit heren Perchtvngs Insigel des Chamermaister, wan Ditrich bei dem Tor nicht aigens Insigel hat. Diser prief ist gegeben ze Wienne nah Christes geburt Dreutzechenhvndert Iar, dar nah in dem drev vnd zwainzichisten Iar, an sant Nyclas tag.

Source Fulltext: WEIS, Heiligenkreuz (=FRA II/16, 1859) S. 94-95