Capitulum Jaurinensis ecclesie omnibus christi fidelibus presentes litteras inspecturis salutem in domino sempiternam. Ad vniuersorum noticiam harum serie uolumus peruenire, quod, cum nos ad instantem peticionem comitis Symonis, castellani de Owar et vicecomitis Musuniensis, per litteras suas nobis factam, discretum virum magistrum Nicolaum cantorem ecclesie nostre, socium et cancanonicum nostrum karissimum, coram quo ipse comes Symon et Johannes filius Valentini, homo excellentissimi domini nostri Karoli, dei gracia illustris Regis Hungarie, reambularent quamdam possessionem Curie Monacorum seu Grangie siue noui predii Pooth uocatam et assignarent ac statuerent dicte Curie reambulatam per ueteres metas et antiquas perpetuo possidendam, pro testimonio duxissemus transmittendum, demum dictus magister Nicolaus cantor ad nos reuersus nobis retulit, quod dicti comes Symon et Johannes, filius Valentini, homo memorati domini nostri Regis, accedendo ad faciem prefate possessionis Pooth nuncupate, conuocatis vicinis et commetaneis ac nobilibus Castri Musuniensis, nec non quampluribus nobilibus et aliis libere condicionis hominibus, de circumiacentibus villis similiter inibi uocatis, de prouincia Musuniensi antedictam possessionem reambulassent et assignassent ac statuissent dicte Curie Monacorum iure perpetuo et irreuocabiliter possidendam nullo penitus contradictore existente. Predicta uero possessio ab oriente et ab aquilone vicinatur possessioni Beliud uocate a meridie autem possessioni Machakad nuncupate, et similiter ab occidente protenditur ad fluuium Fertheu distinctionibus metarum veterum et antiquarum, quibus dicta possessito distingui dinoscitur ab antiquo. In cuius rei memoriam et perpetuam firmitatem presentes concessimus litteras sigilli nostri munimine roboratas. Datum feria secunda proxima post octauas Inuencionis sancte Crucis Anno domini M°. CCC°. vicesimo quarto, Magistris Mathya lectore, Nicolao cantore et Michaele custode ecclesie nostre existentibus.

Source Fulltext: WEIS, Heiligenkreuz (=FRA II/16, 1859) S. 101-102