Karolus dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex, Princeps Sallernitanus et Honoris ac montis sancti angeli dominus omnibus christi fidelibus tam presentibus, quam futuris presencium noticiam habituris salutem in omnium saluatore. Ea potissimum regie excellencie patrocinio conuenit confirmari, que sacrosancte matri ecclesie, que nos in christo regenerat, pia fidelium largicione in elemosinam sempiternam conferuntur. Perinde ad vniuersorum noticiam harum serie volumus peruenire, quod Religiosi viri, frater Corrardus procurator domus Monasterii Sancte Crucis de Posonio ac frater Vlricus ordinis Cisterciensis, vice et nomine abbatis eorum ac totius Conuentus ipsius Monasterii Sancte Crucis de Austria, ad nostram accedentes presentiam exhibuerunt nobis quasdam patentes litteras tenorum infrascriptorum, vnam scilicet Capituli ecclesie Posoniensis et aliam Detrici Houtstoch ac domine Gertrudis uxoris eiusdem, supplicantes nobis humiliter et deuote, vt easdem litteras presentibus transsummi et transscribi, ratificare quoque et approbare, nec non et auctoritate Regia ad vberioris cautele euidenciam de pietate Regia dignaremur confirmare. Quarum quidem litterarum Capituli Posoniensis ecclesie tenor talis est. (Folgt die S. 113, Nr. CXI abgedruckte Urkunde des Domcapitels zu Pressburg, ddo. 2. April 1327.) Item tenor litterarum dicti Dytrici et domine Gertrudis consortis sue talis est. (Folgt die S. 60, Nr. LXVI abgedruckte Urkunde, ddo. Wien 25, Juli 1319.)||
Nos siquidem predictas duas patentes litteras de uerbo ad uerbum presentibus insertas iuxta eorumdem fratrum Corrardi et Vlrici, ordinis prenotati iustam, modestam et salubrem petitionem attendentes, quod in rebus diuinis usibus deputatis sola immensitas est mensura et quod etiam elemosina dux nostre fragilitatis existat, quod nos excusat apud deum de peccatis propitium reddens creatorem et restituens gracie saluatoris, de consilio prelatorum et Baronum Regni nostri approbamus et auctoritate Regia presentisque priuilegii patrocinio confirmamus, ut, quod nostre approbationis et confirmationis series absque cuiuslibet contradictionis obstaculo perpetuo ualeat firmitate consistere, nec per quospiam lapsu temporum in irritum possit uel ualeat aliquatenus reuocari, presentes concessimus litteras nostras priuilegiales, noui et autentici sigilli nostri dupplicis munimine roboratas. Datum per manus discreti viri magistri Andree, prepositi albensis ecclesie, aule nostre vicecancellarii dilecti et fidelis nostri. Anno domini M°. CCC°. XX°. septimo, tercio Nonas Aprilis, Regni autem nostri anno similiter XX°. septimo, Venerabilibus in christo Patribus Dominis Boleslao Strigoniensi et fratre Ladislao Colocensi archiepiscopis, Joanne Nytriensi, fratre Petro Bosnensi, Georgio Syrmiensi, Iwanka Waradiensi, Benedicto Chanadiensi, Ladislao Quinqueecclesiensi‚ Henrico Wesprimensi, Nicolao Jaurinensi, Chanadino agriensi et Andrea Transilvano episcopis ecclesias dei feliciter gubernantibus; Magnificis viris Philippo palatino, comite de Scepes et de Wywar, Demetrio magistro Tawernicorum nostrorum Comite Bachiensi et Trinchinensi, Mykch bano totius Sclauonie, comite Simegiensi, comite Alexandro judice curie nostre, Thoma woywoda Transiluano et comite de Zonuk, Paulo bano de Machou, comite Syrmiensi de wolkou et de Budrugh, Johanne magistro Tawernicorum et Deseu Iudice curie domine regine, consortis nostre karissime, Stephano magistro agasonum, Dyonisio magistro Dapi-ferorum nostrorum et Nicolao comite Posoniensi aliisque quam pluribus Regni nostri Comitatus tenentibus et honores.

Source Fulltext: WEIS, Heiligenkreuz (=FRA II/16, 1859) S. 115-116