Fridericus dei gracia Romanorum Rex semper Augustus, Vniuersis, ad quos presentes pervenerint, fidelibus suis dilectis graciam suam et omne bonum. Piam sanctamque diue recordacionis Magnifici domini Rudolfi Romanorum Regis semper Augusti, Aui et predecessoris nostri karissimi, deuocionem, qua Religiosis viris . . Abbati et Conuentui Monasterii Sancte Crucis in Austria Patauiensis Diocesis Jus montanum de vineis ipsorum, quas in Talarn et Engelschalchdorf possident, relaxauit, in domino commendantes ipsiusque imitari in hac parte vestigia cupientes, predictis Abbati et Conuentui sancte Crucis, pure propter deum Jus montanum, quod de vineis, quas in Talarn et Engelschalchdorf nunc possident, tenentur persoluere, exceptis dumdaxat quatuor vrnis, quas Monasterio Mauerbacensi, nostre fundacionis persoluunt, ex mera benignitatis nostre gracia donamus, largimur et liberaliter relaxamus, habentes ratam et gratam eiusdem Aui nostri donacionem et approbacionem, ipsamque presentis decreti munimine auctoritate Regia confirmantes. In cuius donacionis, ratihabitionis et confirmacionis nostre euidenciam presentes litteras conscribi nostreque maiestatis Sigilli appensione fecimus communiri. Datum in Gutenstain Nonis Nouembris, Anno domini Millesimo CCC°. vicesimo septimo, Regni vero nostri Anno Terciodecimo.

Source Fulltext: WEIS, Heiligenkreuz (=FRA II/16, 1859) S. 116-117