Ich Hanns Steger, zu den zeiten burgermaister zu Wienn und kellermaister in O^esterreich, bekenn von der zu^espru^ech und vordrung wegen, so die ersamen geistleichen herren, bruder Erhart der Wolf, diezeit conmendewr des De^awtschen Haus zu der Newnstat, und die bru^ederschaft gemainkleich daselbs und bruder Stephan der Eysne^ar, diezeit pfarrer zu Gumpoltzkirchen, hincz den erwirdigen geistleichen herren hern Johannsen abbt und dem convent zum Heiligen Krewcz gehabt habent umb den weinzehent, so die egenanten De^awtschen herren mainent ze haben von der benanten geistleichen herren .. des abbts und des convents weinge^arten gelegen in dem gmerkch und pharr zu Gumpolczkirchen, darumb si zu baider seitt hinder erber le^awt nach laut irer hindergengbrief zu schidung gegangen warn, dieselben ir spruchle^awt sich in iren rechtspru^echen nicht geainet haben und gleich sto^essig worden sein, dadurch der ausspruch an den du^erlewchtigen hochgeborn fu^ersten herczog Albrechten, herczogen ze O^esterreich und marggraven ze Me^arhern etc., meinen gnedigen lieben herren, als ainen obman komen und gelanget ist. Nu hat der benant mein gne^adiger herr mit mir briefleichen geschafft und empholhen, den ausspruch an seiner stat umb solh egemelt zu^espru^ech und vordrung des egenanten zehents zu tu^en und ze vertigen, damit yeder tail ain wissen gewinn, wes er sich halten sulle. Und wann aber ich auf des benanten meins gnedigen herren schreiben und emphelhen baider tail kuntscheft, die si habent fu^erbracht, und auch irer spruchle^awt rechtspru^ech aigentlich verho^ert hab, und darumb sprich ich zu recht, seind die egenanten geistleichen herren zum Heiligen Kre^awcz von iren weinge^arten, die si habent und gelegen sein in Gumpolczkircher pharr und gemerkch, emaln den vorgenanten geistleichen herren dem conmendewr zu der Newnstat und dem pharrer zu Gumpolczkirchen geczehent habent nach ausweisung irer kuntschaft, die ich darumb verho^ert hab, darumb su^ellen sy in noch furbaser ewigkleich von denselben iren weinge^arten den zehent geben und raihen, als zehents recht ist, ungeverlich, und was die egenanten der conmendewr zu der Newnstat und der pfarrer ze Gumpoltzkirchen geste^atten, das si auf das recht und den ausspruch mit redleichem ausgeben gelegt haben, und was in die egemelten geistleichen herren zum Heiligen Kre^awcz von solhen eberu^erten iren weinge^arten zehents versessen habent, das su^ellen si alles den egenanten De^awtschen herren bezaln und ausrichten und an iren willen darumb komen zwischen hinn und sand Merten tag nagstkunftig, an widerred und an alles verziehen, ungeverlich. Und sprich auch, welher tail den gegenwurtigen spruch ge^anczleich nicht stethielt oder haben wolt und den wissentleich u^eberfu^er oder dawider te^at, der sol dem obgenanten meinem gnedigen herren .. dem herczogen zu peen vervallen sein auszerichten und ze geben vierhundert pfund Wienner pfenning an alles verziehen und dennoch den spruch halden und dabey beleiben, als der vor geschriben stet, an all ausczug, ungeverlich.||
Und des ze urkund gib ich von geschefft und haissen des benanten meins gnedigen herren des herczogen yedem tail ainen spruchbrief in gleicher lautt, besigilten mit meinem anhangundem insigil. Geben ze Wienn an eritag vor sand Giligen tag, nach Cristi gepu^erd vierzehenhundert jar, darnach in dem funfunddreissigistem jare.