Ich Nyclas an dem Ort von dem Nydern Greitzenstetn. vnd ich Chunrat der fleischacher vnd ich Stephan maendel. vnd ich Mert maendel. vnd alle vnser erben, wir veriehen vnd tvn chunt offenbar mit dem prief allen den dev in sehent oder ho^ernt lesen. Daz vns vnser genediger herr. her Seyfrid zu den zeiten Probst ze Hertzognburg. vnd der Conuent gemain vnser herren. di genad habnt getan, daz wir von vnsern tzwain lehen di wir haben vnd vnser erben. ze dem Nydern Greizenstetn. habn ab gechauft vnsers rechten dienst an dreisig drithalb phunt wienner phenning dienst. Also beschaidenleichn. Daz wir vnd vnser erben vnd nachchomen noch hin fu^erbaz ewichleichn alle jar von vnsern vorgenanten tzwain Lehen schullen diennen an Sand Gyligen tag Sechczig wienner phenning. mit alle dem nucz vnd rechten. als wir vor von alter ir holden sein gewesen. vnd als wir di vorgenanten Sechczig phenning vor in ganczem dienst gedient habn. Vnd zu ainem sichtigen vrchund der vorgenanten wandlung geb wir in disen prief versigelten mit des erbern herren hern Stephans des Eysenpeytel. vnd mit des erbern mannes. Wernheres des hunthos, vnd mit des erbern mannes Vlreich s des Chriechen anhangunden Insigeln. di wir dar vmb fleischcleichn habn gepeten. wan wir nicht aigins Insigels habn gehabt. daz sev irev Insigel an disen prief gehangen habnt. zu ainer sicherhait vnd zu ainem waren gezeug. der vorgenanten sache. Der prief ist gebn nach Christes gepurde. dreuzehen hundert Jar. dar nach in dem Syben vnd funfczgisten Jar An sand Gorgen tag.

Source Fulltext: FAIGL, Herzogenburg (Wien 1886) S. 221-222