Ich Chuenrat von Vreuntzhausen vnd ich Cecilia sein hausvraw. vnd ich Leb von Vreuntzhausen sein brueder vnd ich Katrey sein hausvraw vnd all vnser erben. Wir veriehen vnd tuen chunt allen den di disen brief lesent oder horent lesen. Di nv lebent vnd hernach chunftich sind. Daz wir verchauft haben vnsers rechten aygens, di gu^eter di wir gehabt haben in Chulber pharr. vnd haist in dem Graben, da zu den zeiten auf gesezzen ist Io^erig vnd dient allev Iar Jaerchleich zway phunt wienner phennig. Ain phunt an Sand Merteins tag. vnd daz ander phunt dar nach an Sand lo^ergen tag. vnd ain gut gelegen ze Haugstorf. da zu den Zeiten auf gesezzen ist Ludweig. vnd dient auch zway phunt wienner phennig zu den vorgenanten taegen. dev vorgenanten gu^eter all als vor an disem brief geschriben stet. vnd swaz dar zu geho^ert .... haben wir recht vnd redleich verchauft vnd geben .... vmb vier vnd sechtzig phunt gemainer wienner phennig. der wir gar vnd gaentzleich gewert sein ze rechten taegen. dem erbern beschaiden hern Iannsn von Wildungsmawr gesezzen ze Schoenleiten vnd sein erben .... Vnd daz diser chauf furbas also stet vnd vnzebrochen beleib, dar vber so geb wir ich vorgenanter Chu^enrat von Vreuntzhausen. vnd ich Leb sein bruder. dem egenanten beschaiden hern Jannsn von Wildungsmawr vnd sein erben disen brief versigelten mit vnser baider anhangunden Insigeln. vnd ze einer pezzern sicherhait. mit vnsers O^echems Albrants von Ramsenpach. vnd mit hern Wernharts des Druchsaetzen vnd mit Wolfgers des Reychelsperger. vnd mit Rudolfs des Druchsaetzen di all der vorgeschriben sach gezeug sint. mit irn anhangunden Insigeln. Der prief ist geben nach Christes gepu^erd Dreutzehen hundert Iar. dar nach in dem siben vnd funfczigisten Jar. an Sand Alexii tag.

Source Fulltext: FAIGL, Herzogenburg (Wien 1886) S. 228-229