ICH Leb von Vreuntzhavsen vnd ich Katrey sein Hausvrawe vnd vnser paider Erben. Wier veriehen vnd tuen chunt allen den di disen brief lesent oder horent lesen di nv lebent vnd hernach chunftig sind. Daz wier mit aller vnser erben gueten willen vnd gunst, mit verdachtem muet, vnd mit gesampter hant vnd nach vnser pesten vreunt Rat zv^e der zeit da wier iz wol getuen mochten, verchauft haben vnsers rechten vreyn Aygens, vnsern hof gelegen datz Teufleinsdorf mit allem dem vnd dar zu^e geho^ert ze veld ze dorf versuecht vnd vnuersuecht gestift oder vngestift. wie daz genant ist. vnd der da dient alle Iar Iaerichleich zwen vnd sechtzig metzen chorns. vnd fumf vnd sechtzig metzen habern. vnd funftzehen chaes. ie den chaes fu^er sechtzehen wienner phennig vnd zehen herbst hv^enr vnd sechs vaschang huenr vnd vier gaismich Gens, da zu den zeiten auf gesezzen ist Jeubart vnd Stephan sein bru^eder. Vnd ain guet ze Grueb mit alle dem vnd auch dar zu^e geho^ert ze veld vnd ze dorf versuecht vnd vnuersuecht gestift oder vngestift, wie so daz genant ist, vnd da zu den zeiten auf ist Chu^enrad vnd dient alle Iar Jaerchleich ein halb phunt wienner phenning vnd zwainczig phenning. vnd zwelf chaes ie den chaes fu^er sechtzehen wienner phenning vnd di gelegen sint in Chulber pharr. Dev vorgenanten gueter alle haben wir recht vnd redleich verchauft vnd geben mit allen den nvtzen vnd rechten als wir sev in aygens gewer her pracht haben vmb Siben vnd Neuntzig phunt gemainer wienner phenning der wir gar vnd gaentzleich gewert sein ze rechten taegen dem erbern beschaiden hern Jansen von Wildungsmawr gesezzen ze Scho^enleiten vnd sein erben fu^erbaz ledichleich vnd vreileich ze haben vnd allen iern frum da mit ze schaffen mit verchaufen mit versetzen vnd geben vnd machen swem si wellen an allen ierrsal. vnd sein auch ich vorgenanter Leb von Vreuntzhausen vnd ich Katrey sein Hausvrawe vnd all vnser Erben vnverschaidenleichen der vorgenanten gueter als vor an disem brief geschriben stet des vorgenanten beschaiden herrn Iannsn von Wildungsmawr vnd seiner erben ir recht gewer vnd scherm fu^er alle ansprach als aygens recht ist vnd des landes recht in Osterreich. Wer aber daz daz si mit recht an dem vorgenanten guet als vor geschriben ist. icht chrieges oder ansproch gewunnen. swaz si dez schaden nement. daz schull wir in alles ausrichten. vnd wider chern. an allen irn schaden. vnd schullen auch si daz haben auf vns vnverschaidenleichen. vnd auf allem vnserm guet daz wir haben in dem land ze O^esterreich oder swo wir iz haben, wir sein lebentich oder tod. Vnd daz diser chauf furbas also stet vnd vnzebrochen beleih, dar vber so gib ich vorgenanter Leb von vreuntzhausen. dem egenanten beschaiden hern Jannsn von Wildungsmawr. vnd sein erben disen brief versigelten mit meinem anhangunden Insigel. vnd ze einer pezzern sicherhait mit meines geswein Nyclas des Tanprukker. vnd mit Gotfrits des Tanprukker. vnd mit meines bru^eder hern Chu^enrats von Vreuntzhausen. vnd mit hern Wernharts des Druchsaetzen vnd mit Wolfgers des Reychelsperger. vnd mit Rudolf des Druchsaetzen. di all der vorgenanten sach gezewg sind mit iern anhangunden Insigeln. Der prief ist geben nach Christes gepurd drewczehen hundert Iar. dar nach in dem siben vnd funfczigistem Iar. An Sand Alexii tag.

Source Fulltext: FAIGL, Herzogenburg (Wien 1886) S. 229-230