Ich Katrey hern vlreichs tochter von Elsarn hern Geniken hausvrow vergich vnd tuen chunt allen leuten daz ich mit verdachtem muet vnd mit guetem willen vnd nach gunst meiner nachsten freunt. vnd zu der zeit do ich iz wol getuen mocht. han geben meines rechten aygen daz mich angestarben ist von meines vater tod hern vlreichs von Elsarn dem got genad. funf phennig gelts wienner muniz vnd new phennig die man dient an sand Michels tag. von ainem achker der do leit in dem Gerhertleins. mit allen den rechten vnd nvtzen als ich in vnd mein vodern gehabt haben, also hab ich die vorgenanten funf phenning gelts geben inrrchleichen durich got vnser vrowen gotshaus ze Salapulka. also beschaidenleich daz man ebichleichen schol piten vmb mich vnd vmb meinen wiert hern Geniken vnd vmb hern vlreichen von Elsarn mein vater vnd vmb all vnser vodern. Daz die red also stet vnd vnzebrochen beleib dor vber so gib ich disen prief zu einer offen v^erchund vnd zu ainer sichtigen worhait. vnd wan ich vorgenantev Katrey aygens Insigels nicht enhan so verpint ich mich hinder meines wierts Insigels hern Geniken stet ze haben alles daz daz vor verschriben ist an dem prief. vnd der vorgenanten wandlung ist zeug fridreich der zobel von Sichartzreut mit seinem anhangunden Insigel. Der prief ist geben noch Christes gepu^erd vber dreutzehen hundert Jar dar nach in dem siben vnd funfczkisten Jar an dem Svnewen tag.

Source Fulltext: FAIGL, Herzogenburg (Wien 1886) S. 226