ICH Wernhart der Truchsezz von Reychersdorf vnd mein Hausfrauwe vrowe Agnes vnd vnser baider erben. Wir veriehen offenlich an disem Prief daz wir mit wolbedachtem muet vnd gesampter hant zu der zeit do wir iz wol getun mochten durch merung des lobes des Almechtigen gotes seiner lieben muter Marie vnd der Hayligen Junchfrowen sand Kathrey vnd auch aller Hayligen recht vnd redlichen geben haben sand Jorgen Gotzhaus ze Hertzogenburch vnsers rechten vreyen chauf aigens vnd Purchrechts die gueter die her nach geschriben stent. Des ersten tzway guter am Gugrel pei Wilhalmspurch aynz da zu den zeiten aufgesezzen ist Leutolt vnd dient alle Iar auf Sand Po^elten tag acht vnd achzig phennig. Daz ander da Nycla Antychrist zu den zeiten aufgesezzen ist vnd dient acht vnd funfczig phennig. vnd ain gut zu Radhawe da Dytel der Smyt zu den zeiten auf gesezzen ist. vnd dient vier vnd sechzig phenning vnd ain gut am Chalch da Seyfrid zu den tzeiten auf gesezzen ist vnd dient tzwen vnd dreizzig vnd ain gut pei den Mulhofen da zu den tzeiten Pleyschan vnd Chunrat sein gemainer auf gesezzen sint vnd dient acht vnd achzig phennig. Vnd ain gut zu Mulhofen da zu den tzeiten Jans der Voyt auf gesezzen ist. vnd dient Sybentzig phennig. Vnd ain gut an dem Pruchlein da zu den zeiten Lewbel der Sneyder auf gesezzen ist vnd dient ain halbz phunt vnd ainen phennig vnd tzwai guter in dem Marcht zv Wylhalmspurch daz ain an dem frauwen Marcht da ze den tzeiten Haintzel der Chrell auf gesezzen ist. vnd dient acht vnd sechzig daz ander da Dymut die Paderin zu den zeiten aufgesezzen ist vnd dient z welf phennig vnd sechzig phennig geltes auf vberlent vmb den Marcht zu Wilhalmspurch vnd ain Lehen zu Purgmansdorf da zu den zeiten Albrecht aufgesezzen ist. vnd dient alle Iar Newn Schilling acht vnd tzwainzig phenning halb auf sand Michels tag vnd halb auf sand Jorgen tag. Vnd ainen Hof zu Mawterhaim da Chunrat zu den tzeiten auf gesezzen ist vnd dient alle Iar ain halbz phunt auf sand Jorgen tag vnd funf vnd tzwainzig phenning auf sand Michels tag. Vnd drew Lehen in Chulber pharr ainz haizt am Hyntperg da fridreich zu den zeiten auf gesezzen ist vnd dient alle Iar ayn Phunt vnd vier phenning. Daz ander vor dem Lerpawm da Hainreich zu den zeiten auf gesezzen ist vnd dient alle Iar acht vnd achzig phennig vnd ayn Lehen zu Edlitz da Vlrich in dem Pawmgarten auf gesezzen ist vnd dient drey Schilling vnd drey phenning vnd sechzig phenning auf aim weingarten zu Reychersdorf den zu den zeiten Dytel der Chramer zu Hertzogenburch von mir gehabt hat. Vnd acht vnd tzwainzig phenning von aim weingarten am Plessengraben den zu den zeiten Philipp der Schuster von Potenprunn von mir gehabt hat. Wir haben auch in gesatzt vnsers rechten vreyen purchrechtes mit vnsers purchherren hant vnd willen des Erwirdigen herren. Abbt Dytreichs zu Chotweig ainen Hoff vnd tzwn Hofstet zu Ossarn von dew man alle Iar dient vierdhalb phunt phennig vnd von dew man hin wider dient vnserm vorgenanten Purchherren dreizzig phennig auf sand Michels tag alle iar vnd nicht mer. den vorgenanten Hof vnd Hofstet hab wir in gesatzt fur sechzig phunt wienner phennig als satzung recht ist in dem land zu Osterreich Also beschaidenleich wan daz wer daz ich vorgenanter Wernhart oder mein erben oder mein vorgenant Purchherren die vorgenanten Hof vnd Hofstet losen vmb sechzig phunt phennig den schullen sie vns zu losen geben an alle wider red vnd schol die losung alle iar geschehen auf sand Jorgen tag. Von den selben vorgenanten gutern reicht man mir vorgenanten her Wernhart oder meinen erben zu Vogtrecht vnd zu vrchund ieder gestift Hold tzwen phennig vnd nicht mer. Die vorgeschrieben guter han ich vorgenanter Wernhart dem vorgenanten gotzhaus recht vnd redlich geben versuecht vnd vnuersuecht gestift oder vngestift mit allen den nutzen vnd rechten als ich sy vnd mein erben her bracht haben vnd schol ich noch mein erben daz vorgenant gotzhaus von der vorgenanten vogtey wegen an den vorgenanten gutern an dhainen dingen irren denn daz sy allen iren frumen damit schullen vnd mugen schaffen als mit andern irs gotzhaus alten aygen. Vnd dar vmb so hat sich der Erber geystlich herr Probst Seyfrid mit allem Conuent vnd alle ir nachchomen gegen mir vnd allen meinen erben verlobt vnd verpunten daz sy mir hin fur Ewicleich in der Capellen zu Reichersdorf messe haben vnd auzrichten schullen alle Suntag Mentag Mitichen freytag Samtztag vnd dar tzue schol ich vorgenanter Wernhart oder wer in meinem haus ist ainen helfer mit allem dem gerechten der zu dem Altar vnd der mess gehort schicken vnd haben. Vnd wann daz wer daz der vorgenanten messe ayne an der vorgenanten taege ainem nicht gesprochen vnd vollfurt wurd on geverd die scholl man an vnterlazz des nahsten Erigtags vnd Pfintztags sprechen vnd volbringen. Wer auch daz des got nicht engeb daz der vorgenant her Seyfrid Probst zu Hertzogenpurch mit allem Couent oder alle ir nachchomen an dem vorgenanten gotzdinst vnd messen saumig were vnd nicht allez daz volfurt vnd begingen als vorgeschrieben stet so sol ich mich vorgenanter Wernhart oder mein erben des vorgenanten geltes alles an schaden vnterwinden vnd schol daz inne haben ain Mened vnd in dem selben Mened schullen sy mir vnd meinen erben alle die Sawmichait die an dem vorgenanten gotzdinst geschehen wer erfullen vnd vollpringen. teten sy des nicht so schullen furbaz die vorgenanten aylef phunt geltes mir vnd meinen erben vrey vnd ledich sein vnd schullen vnd mugen wir damit schaffen allen vnsern frumen als iz vns aller pest fugt an alle ir vnd alle ir nach chomen widerred vnd irrung. Vnd daz die vorgeschrieben sache vnd wandelung hin fur ewicleich also stet vnd vntzerbrochen beleib, dar vber so gib ich vorgenanter Wernhart disen prief versigelt mit meinem anhangunden Insigel zu ainem waren vrchund vnd mit des erbern geystlichen herren Abbt Dytreichs zu den zeiten zu Chotweig meines Purchherren anhangenden Insigel. Vnd mit meiner Vetern Jans vnd Jorgen die Truchsezzen von vtzensdorf vnd her Jorg der Truchsetz vom Sitzenperg. Vnd her Chunrat von frewntzhausen vnd Leb sein pruder die diser vorgenanten sache alle geczeug sein mit iren anhangenden Insigel. Der prief ist geben do man zalt nach Christus gepurd drewzehen hundert Iar dar nach in dem acht vnd funftzigisten Iar auf sand Merteins tag.

Source Fulltext: FAIGL, Herzogenburg (Wien 1886) S. 231-234