ICH Ioerg von Gotzensdorf vnd ich Margret sein Hausfrauwe vnd ich Herdegen sein Su^en vnd alle vnser Erben wir veriehen vnd tun chunt offenlich an disem Prief allen den die in sehent oder horent lesen die nv lebent oder her nach chunftig sint. Daz wir mit aller vnser erben guten willen vnd gunst mit verdachten mut vnd mit gesampter hant vnd nach vnser besten frewnt rat zu der zeit do wir iz wol getun mochten verchauft haben vnsers rechten vreyen Aygens anderthalb lehen die gelegen sind zu Hawsdorf in Chulber Pfarr vnd von dem lehen man alle (iar) dient aynen Mutt chorn ainen Mutt habern sechs schilling pfennig vnd von dem halben lehen zwelf Metzen chorn vnd tzwelf Metzen habern sechs schilling pfennig vnd ain halbez lehen gelegen daz da haizt in dem Graben auch in Chulber pfarr von dem man alle Iar dient ainen halben Mutt chorn ainen halben Mutt habern sechs Kes oder fur ieden Kes sechzehen pfennig ain gans zwai herbst huner vnd zwai vaschang huner. Die vorgenanten guter allew haben wir recht vnd redleich verchauft vnd geben mit allen den nutzen vnd rechten zu veld vnd zu dorf holtz oder wysmad gestift oder vngestift versucht oder vnuersucht swie so daz genant ist als wir sew vnd vnser erben in aigens gewer her bracht haben vmb Aecht vnd Siebentzig pfunt sechs schilling vnd tzwaintzig pfennig gemainer wynner pfennig der wir gar vnd gentzlich gericht vnd gewert sein dem erbern beschaiden hern Jansen von Wildungsmawr vnd seinen erben furbaz ledicleich vnd freileich zu haben vnd allen iren frvm da mit ze schaffen mit verchaufen mit versetzen vnd geben vnd machen swem si wellent an allen irrsal vnd sein auch ich vorgenanter Io^erg vnd ver Margret sein Hausfrauwe vnd Herdegen vnser Su^en vnd alle vnser erben vnuerschaidenleich die vorgenanten gu^eter als vor an disem brief geschrieben stet des vorgenanten beschaiden hern Jansen von Wildungsmaur vnd seiner erben ir recht scherm vnd gewer fu^er alle ansprach als aigens recht ist vnd des landes recht in O^esterreich. Wer aber daz daz sy mit recht an dem vorgenanten guet als vor geschrieben ist icht chriegs oder ansprach gewunne swaz sie des schaden nemen daz schull wir in allez auzrichten vnd wider cheren an allen iren schaden vnd schullen auch sy daz haben auf vns vnverschaidenleich vnd auf alle vnserm gut daz wir haben in dem lant ze O^esterreich. oder swo wir iz haben wir sein lebentich oder tod. Vnd daz diser chauff furbaz also stet vnd vnzerbrochen beleib dar uber so gib ich vorgenanter lo^erg von Gotzensdorf vnd ich Herdegen sein Sun disen Prief versigelten mit vnser paider anhangunden Insigel. Des sint auch getzeug die erbern beschaiden Her Chunrat von frewntzhausen her Jans der Dotzenpech Albrant von Ramsenpach Leb von frewntzhausen mit irn anhangunden Insigeln. Der prief ist geben nach Christus gepurd drewzehen hundert iar dar nach in dem Newn vnd funfzigsten Iar des naesten Erigtags nach dem Auffer tag.

Source Fulltext: FAIGL, Herzogenburg (Wien 1886) S. 237-238