ICH Stephan von Mizzingdorf vnd ich Johanna sein Hausvrow vnd all vnser erben wier vergehen vnuerschaidenleich an dem prief vnd tuen chunt offenchleich allen den die in sehent oder horent lesen die nv lebent oder hernach chunftich sint Daz wier mit wol verdachtem muet vnd mit gunst vnd mit guetem willen aller vnser erben vnd mit rat vnser pesten vreunt zu der zeit do wier iz wol getuen machten, recht vnd redleich verchauft haben funczehen schilling gelts wienner phennig die man aller ierchleich dient an sand Michels tag, vnd daz vnser rechts chaufguet gewesen ist vnd daz do leit datz gnandestorf auf siben Lehen vier Lehen die vnser rechtz aigen sind gewesen vnd dient aller ierchleich siben schilling phennig wienner muniz an sand Michels tag vnd dreu Lehen die vnser vreis pu^erchrecht sind gewesen von dem erbern herren von Dagsperch, do man aller ierchleich von dient ain phunt phennig wienner muniz an sand Michels tag, vnd von den vorgenanten drin Lehen hab wier gedient alle iar ze pu^erchrecht dem egenanten erbern hern von Dagsperch ein halben wienner phennig an sand Michels tag vnd nicht mer seinem amptman gen egenbuerch. Vnd recht als wier die vorgenanten funfzehen schilling gelts datz gnandestorf zten zeiten gehabt haben in nutz vnd in gwer vnversprochenleich versuecht vnd vnuersuecht gestift vnd vngestift ze veld vnd ze dorf iz sei purchrecht oder aigen swie so daz genant ist, also hab wiers durich vnser sel hail willen ledichleichen ze chauffen gegeben zu vnser vrowen gotzhaus in daz Pirichech, dem erbern geistleichen mann hern Chunrat dem Lochler chorherr ze Hertzogenburch zten zeiten pharrer ze Salapulka vmb vierzk phunt phennig gemainer wienner muniz der wier vnd vnser erben gantz vnd gar recht vnd redleich gewert sein ze rechten tegen an allen schaden. Vnd schol auch der vorgenant her Chunrat der Lochler vnd all sein nachchamen pei dem egenanten vnser vrown gotzhaus die vorgenanten funfzehen schilling gelts hin fuer ledichleich vnd vreileich haben verchauffen versetzen geben wem seu wellen vnd all iern frum do mit schaffen an allen iersal. ich pin auch egenanter Stephan von Mizsingdorf vnd mein erben vnuerschaidenleich des vorgenanten hern Chuenrats des Lochler oder wer pharrer datz dem egenanten vnser vrown gotzhaus ist der oft genanten gult datz gnandestorf ier recht scherm vnd gwer fuer all ansproch als aigens vnd purchrechtz recht ist in dem Lant ze Osterreich. Wer awer daz der vorgenant her Chunrat oder sein nachcho^emen an dem egenanten guet icht chrieg oder ansproch gewvnen von vns oder von. vnsern erben oder von wem daz wer daz seu mit recht schaden nemen, den selben schaden den der selb her Chunrat oder wer des egenanten gotzhaus phleger ist mit recht gesprechen mag den schull wier vnd vnser erben in gantz vnd gar abtragen vnd ausrichten an all iern schaden. Daz lob wier dem vorgenanten hern Chunrat vnd allen sein nachchomen pei vnser vrown gotzhaus als ze laisten vnd stet behalten mit vnsern trewn an als gever vnd schullen seu iz dar zue haben auf vns vnd auf vnsern erben vnverschaidenleich. vnd auf all vnserm guet daz wier haben oder hinder vns lazzen in dem Lant ze Osterreich, vnd schullen sein do von becho^emen mit vnserm guetleichen willen an all widerred; wier sein lemtig oder tod. Vnd daz die red also stet vnd vnzebrochen beleib dar vber so gib ich Stephan von Mizsingdorf dem vorgenanten hern Chunrat vnd allen seinen nachcho^emen pei vnser vrown gotzhaus disen prief zu einer waren v^erchund der sach versigelt mit meinem anhangundem Insigel. Der sach vnd der red sind auch zeug mein prueder her Hainreich vnd her Thobitz vnd her Seibot, vnd Hainreich mein swager von Butigenaw mit iern aigen anhangunden Insigel. Der prief ist geben nach Christes gebùrd vber dreuzehen hundert iar dar nach in dem nevnvndfunfzkisten iar an sand Mathias tag.

Source Fulltext: FAIGL, Herzogenburg (Wien 1886) S. 235-236