ICH Chunrat von freuntzhausen vnd ich Cecilia sein Hausvraw. vnd ich Leb sein Prueder vnd ich Kathrey sein hausvrav vnd all vnser Erben wir veriehen vnd tuen Chunt allen den die disen prief sechent oder ho^erent lesen die nv lebent oder hernach chunftig werdent. Daz wir mit wol wedachtem muet zu der zeit da wir is wol getuen machten vnd mit gesampter hant vnd mit vnser Erben gueten willen verchauft haben vnsers rechten vrein aygens ain halbes pfunt vnd Newn vnd zwaintzk phening geltz die da gelegen sind auf zwelif jeuchen Achers, vnd hayzzt in dem Schiltpach vnd die man alle iar dient an sand Michels tag dem Erbern weschaiden hern Jansen von Wildungzmaur vnd seinen Erben mit alle den nutzen vnd rechten als wir is her pracht haben zu verseczen zu verchauffen vnd geben swem Sy wellen an alle vnser Irrung vmb zehen pfunt gemeiner wienner phennig der wir gantz vnd gar gericht vnd gewert sein. Wir sein auch dez vorgenanten geltz dez vorgenanten hern Jansen von Wildungzmaur vnd seiner Erben Recht Scherm vnd gwer fu^er all ansproch. Waer auer daz in mit recht dar an icht abgieng Daz schull wir in alles ausrichtn vnd wider chern vnd schull si daz haben auf vns vnd auf alle dem guet daz wir haben oder lazzen in dem land ze O^esterreich. Daz lob wir in mit vnsern Trewn vnd daz in daz furbaz stet vnd vntzebrochen weleib dar vber so geb wir in disen prief versigelt mit vnser payder anhangunden Insigel vnd dez ist auch getzeug vnser veter Wolfhart der Reychersperger mit seinem anhangunden Insigel. Der prief ist geben nach Christes gepu^erd Dreutzehen hundert iar dar nach in dem newn vnd funczkisten iar an sand Symons tag.

Source Fulltext: FAIGL, Herzogenburg (Wien 1886) S. 240