ICH Vlreich der Haekkinger vnd ich Elzbet sein hausurow. Wir vergehen vnd Tu^en chunt allen den die disen brief lesent oder horent lesen. die nu lebent vnd hernach chunftich sind. Das wir mit vnser erben gu^etem willen vnd gunst mit verdachtem mùt. vnd mit Gesamter hant. zu der zeit do wir es wol getun mochten. Verchauft haben vnsers rechten Chauf aigens daz wir miteinander mit gesampter hant gechauft haben. an sechs phenning. drithalb phunt wienner phenning gelts gelegen ze obern Muechsnitz. auf vier behausten lehen. vnd auf allem dem vnd dar zue geho^eret ze velde vnd ze dorff es sei gestift oder vngestift, versucht oder vnuersucht. wie so das genant ist. Die vorgenanten drithalb phunt wienner phennig gelts an sechs phenning haben wir recht vnd redleich verchauft vnd geben mit allen den nutzen vnd rechten als wir si in aigens gewer her pracht haben. vmb acht vnd dreizzich phunt wienner phenning. der wir gar vnd gaentzleich gewert sein. Dem erbern herren hern Chunraten dem Loechler Chorherre ze Hertzogenburch vnd zu den zeiten Pharrer datz vnser vrowen in dem Pirichaech. der die vorgenanten Gult gechauft hat im vnd allen seinen nachchomen die der selben seiner Pharrchirichen nach im Pharrer werdent. ze nutz vnd ze frumen fu^erbas ewichleich da bei ze beleiben. Vnd sein auch wir ich Vlreich der Haekkinger vnd ich Elzbet sein Hausurow vnd vnser erben vnverschaidenleich der vorgenanten drithalb phunt wienner phenning gelts an sex phenning des egenanten hern Chunrats des L o^e chler vnd seiner nach chomen. die der egenanten seiner Pharrchirichen nach im Pharrer werdent. Recht gewern vnd scherm fu^er alle ansprach als aigens recht ist vnd des Landes recht ze Osterreich. Waer aber das si mit recht an der selben Gult icht chriegs oder ansprach gewunnen von wem das waer was si des schaden nement. daz ir ainer bei seinen Trewen gesagen mag. das sullen wir in allez ausrichten vnd widerchern an allen iren schaden. Vnd sullen auch si das haben auf vns vnverschaidenleich vnd auf allem vnserm Gu^et daz wir haben in dem Lande ze O^esterreich, oder wo wir es haben, wie so daz genant ist wir sein lebentich oder tode Vnd das diser Chauf fu^erbas also staet vnd vntzerbrochen beleibe. Dar vber so geben wir ich Vlreich der Haekkinger vnd ich Elzbet sein Hausurow in disen prief zu einem waren v^erchunde vnd ze einer ewigen vestnung diser sache versigelten mit vnserm Insigil. vnd mit meiner pru^eder Insigiln hern Maricharts des Haekkinger. zu den zeiten Chapplan des edeln hochgeboren fu^ersten hertzog Rudolfs ze Osterreich ze Steyr vnd ze Chernden vnd Pharrer ze Chu^essenach vnd Hainreichs des Haekkinger. und mit Vlreichs Insigil des Rustpekchen. die diser sache gezeug mit iren Insigiln. Der brief ist geben nach Christes gebu^erd drewtzehen hundert iar. dar nach in dem Newn vnd fumfczgisten iar an der heiligen aindlef Tausent Maide Tage.

Source Fulltext: FAIGL, Herzogenburg (Wien 1886) S. 238-239