ICH Alram der Poetynger vnd ich Dorothea sein Hausvrow vnd all vnser Erben Wier vergehen vnuerschaidenleich vnd tuen chunt offenleich mit dem prief alln leuten de in sehent oder horent lesen de nv lebent oder hernoch chunftig sint. daz wier mit wol verdachtem muet. vnd guetem willn vnd gunst aller vnser erben vnd noch rot vnser pesten vrevnt zu der zeyt, do wier iz wol getuen mochten. recht vnd redleich verchauft haben vnsers rechten vrein aygens vier phunt vnd subenczehen phenning geltz Wyenner mu^enizz de gelegen sind in der Pharr datz sand Gothart auf dreuczehen bestiften guetern de her nach beschriben stent von erst ans stumphleins stat, dient sechs ches dreyzzig phenning zway herist huern (sic) zway vaschang huern, Ludweyg auf dem ekk dient drey ches fünf phenning vnd ain vaschang huen vnd ain herbst huen Hainreich vnder dem holtz dient sechs ches dreyzzig phenning zway herbst huern zway vaschang huern Herman auf der leiten dient drey ches zehen phenning ain herbst huen vnd ain vaschang huen Chunrat an der neunteufelstat dient drey ches zehen phenning ain vaschang huen vnd ain herbst huen An des puebenstat dient drey ches zehen phenning ain herbst huen ain vaschang huen. An dez Gstyerstat dient drey ches zehen phenning ain herbst huen ain vaschang huen. fridreich in der hêll dient drey ches zehen phenning ain herbst huen ain vaschang huen. Auf dem mayr hof dient suben ches fumf vnd vierczig phenning drev vaschang huern drev herbst huern. Vlreich im techsenpach dient drey ches zehen phenning ain herbst huen ain vaschang huen Chunrat der pink dient drey ches zehen phenning ain herbst huen ain vaschang huen Hainreich ze Aufenstain dient anderthalben ches funf phenning ain halbs herst huen ain halbs vaschang huen. Peter am trautmarsperg dient anderthalben ches sechs phenning ain halbs herst huen ain halbs vaschang huen. De vorgenanten gueter alle ze veld vnd ze dorf bestift vnd vnbestift versuecht vnd vnuersuecht, wie so daz genant sey alz wier iz in nucz vnd in aygens gewer mit recht her procht haben also hab wier iz ledichleich ze chauffn geben dem erbern geystleichen herren hern Chunrat dem Lochler Chorher ze hertzognburch ze sand Gorign gotzhaus vnd den geystleichen Chorhern da selbz, Vm ains vnd Sechczig phunt phenning wienner mu^enizz, der wier ganczz vnd gar gewert sein an alln schaden. Iz schulln auch de vorgenanten Chorhern datz Hertzogenburch hin fuer ewichleich mit dem ee genanten gu^et alln iern frum schaffen mit verchauffen mit verseczzen vnd gebn wem se welln mit vnserm guetleichen willn an alln yrsal. Wier sein auch dez ee gnanten guetz ier recht scherm vnd gewer fu^er all ansprach noch dez landes recht in Osterreich. Wer aber daz den ee gnanten geystleichen Chorherren datz Hertzogenburch an dem ee gnanten guet mit recht icht ab gyeng daz ier ainer pey sein trewen gesprechen mocht daz schull wier in allz abtragn. vnd wyder cheren. an alln iern schoden vnd schulle se daz habn auf vns vnd auf alln vnsern erben vnverschaydenleich vnd auf allem vnserm guet daz wier habn vnd lazzen in dem Land ze Osterreich, oder wo wier iz habn wier sein lemtig oder tot. Daz lob wier in alz stet ze habn mit vnsern trewen an allz gever. Daz de red also furbas stet vnd vnczebrochen beleib, dor vber gib ich vor gnanter Alram der Potinger fuer mich vnd fuer mein hausvrown Dorotheam vnd fur all vnser erben den ee gnanten geystleichen Chorhern ze Hertzogenburch den prief versygelt mit meim aygen anhangundem Insygel vnd der sach sint auch zeug fridreich der Po^etinger. Albrecht der nevnhofer. Pyligreim der flemming mit iern aygen anhangunden Insygeln. Der prief ist gebn noch Christ gepuerd vber Dreuczehenhundert Iar dor (nach) in dem sechczigistem Iar an sand Po^elten Tag.

Source Fulltext: FAIGL, Herzogenburg (Wien 1886) S. 241-242